Politica | 04.08.2011 | 15:47

Metà legislatura de Mussner/3: matura ladina per l bilinguism y materies per nglëisc

La scola paritetica ladina dëssa se svilupé inant y se adaté ai bujëns di tëmps. Pra l’ancunteda de metà legislatura à l assessëur ladin Florian Mussner (NCUEI) ai 04 de agost a Sureghes cunedì che n ulëssa mëter man l nseniamënt de vel materia tla rujeneda nglëija. La matura paritetica dëssa unì recunesciuda per l bilinguism „B“.

Per anjenië nosc jëuni mo miec a chël che ti vën damandà tla vita iesen tl Assessorat ladin tl lëur de mëter a jì l nseniamënt de vel materia dla scola auta per nglëisc. „La cunescënza dla nfurmatica y vel materia economica tla rujeneda nglëija judëssa i jëuni a giapé na lerch tl’universiteies oradecà y dajëssa mo na miëur basa per zapé ite tl lëur“ à dit Florian Mussner.

N mpëni che l assessëur ala scola ladina se à tëut dant per i proscimi mënsc ie de purté inant l recunescimënt dla matura paritetica tla scoles ladines. Sce la matura tudëscia deberieda cun n studi universiter per talian o dardëus, na matura taliana y n studi per tudësch vën recunesciù per l bilinguism „A“, uel Mussner arjonjer che la matura paritetica vënie recunesciuda per l bilinguism „B“. „Chësc ie de gran valor per seguré l daunì de nosc jëuni tl ciamp dl lëur“ à dit l assessëur ala scola ladina. Per astilé ora che chësta ucajion unissa melaudrveda fajan me l’ultima tlas de na scola auta ladina, ulëssen mëter la cundizion de mustré su 10 ani de scola paritetica per giapé l bilinguism de segondo livel (B).

Per la scola auta scumëncia de setëmber l prim ann de scola do l reforma dla scola auta. Na particularità che l assessëur à persunalmënter purtà inant ie la ntroduzion dla segonda ëura de ladin de ublianza per duta la scoles autes de Gherdëina y dla val Badia.

as

Galaria dales fotografies

Mussner à dit de ulëi sustenì inant l plurilinguism tla scola ladina sciche valor sëuraprò