Politica | 04.08.2011 | 16:40

Metà legislatura de Mussner/4: internet a slune ie de priorità

Duc i chemuns dëssa unì tachei ite al internet a slune tres la rë de fibres otiches. A chësc mpëni ti à l assessëur Florian Mussner dat priorità nchin dl 2013, per garantì la cualità de vita nce ti raions ora di majeri zëntri. Na majera pert di nvestimënc dai pro ie proietei tla val Badia.

Ti ani 60 oven abù la vijion de arjonjer duc i luesc da paur cun na streda, strom y ega. Chësc per ti dé la puscibltà ala jënt de viver te nosta bela natura y de viver cun cualità. A chësta vijion se à nce tacà ite l assessëur Mussner pra l ancunteda de mesa legislatura (NCUEI) ai 04 de agost a Sureghes. Nchin dl 2013 uel l assessëur provinziel ala nfrastrutures miuré dassënn i culegamënc internet arjunjan uni chemun cun la fibres otiches. Per arjonjer chësta mira ambiziëusa iel debujën de culaburazion cun i autri assessorac provinziei, cun i chemuns y d’autra istituzions. „Duc muessa fé si pert y nëus tl Assessorat ai lëures publics son cuntënc de avëi sëurantëut la coordinazion“ à dit Florian Mussner. L miuramënt ne sarà nia permò per la fin dl 2013, ma n var a liede, lëur per lëur. „Per na cuestions de dërc ne saral nia mesun arjonjer uni cësa, ma ulon arjonjer uni chemun“ à dit Mussner.

Per i culegamënc internet a slune iel chëst ann unì udù dant 19,2 milion de euro. Te duta la legislatura iel unì calculà 30 milion de euro per i culegamënc internet. Tla val Badia ulache ti ani passei fovel do la rata unì fat puech iel śën de gran proiec. „De duta la soma a desposizion vëniel tla val Badia fat nvestimënc per feter 4 milion de euro“ à dit Florian Mussner.

Te Gherdëina fovel i ani passei bele unì fat n bon lëur. Śën iel inò debujën de lauré laite y perchël ie l assessëur ala nfrastrutures tl lëur de mëter a jì n’acurdanza cun Telecom.

as

Galaria dales fotografies

L internet a slune à priorità danter i mpënies dl assessëur Mussner che se à tla scolina Sureghes ancuntà cun i media