Atualità
Ai 16 d’agost: lîta di posc' tles scolines ladines
USP - En mertesc, ai 16 d’agost dl 2011, ti vëgnel dè ia i posc' por l’ann de scolina 2011/12 al personal pedagogich dles scolines ladines. La lîta di posc' scomencia dales 9 da doman tla sënta dla Direziun dles scolines a Picolin.
La pröma lîta di posć, dales 9 danmisdé, reverda i trasferimënć dles maestres. Dedô gnaràl dè ia i posć lëdi aladô dla graduatoria provinziala por les maestres y les maestres d’integraziun. Dales 10 inant gnaràl dè ia i posć por trasferimënt y spo chi por les colaboradësses pedagogiches aladô dla graduatoria.
Indöt gnaràl dè ia danter inćiaries anuales y suplënzes plü cörtes 22 posć da maestra (11 tla Val Badia y 11 te Gherdëna), 3 da maestra d’integraziun tla Val Badia y 9 da colaboradëssa pedagogica (5 tla Val Badia y 4 te Gherdëna), indöt 34 posć. Ara se trata en pert de posć a tëmp plëgn y en pert a tëmp parzial.
“La situaziun é por le momënt chëra che al é de plü posć co maestres de scolina sön graduatoria, insciö ch’al mëss inće gnì tut sö maestres zënza le titul de stüde preodü”, dij la ispeturia Edith Ploner. Tl medemo tëmp él de plü colaboradësses pedagogiches co posć a desposiziun. Les inćiaries diretes fora de graduatoria gnarà dades do che les graduatories é rovades. En chësc ann él de plü domandes da pert de porsones interessades por le laûr pedagogich tles scolines.
Por l’ann de scolina 2011/12 él gnü tut sö indöt 744 mitans y mituns tles 17 scolines y 35 seziuns, 4 de plü co l’ann passè. La majera scolina é la scolina Salieta da Urtijëi cun 125 mituns y mitans, la plü picera é chëra da Lungiarü cun 9 mituns y mitans. Le majer aumënt de mituns y mitans por l’ann de scolina 2011/12 é stè a La Val, olache al é stè n aumënt dl 26 % di iscrić en confrunt al ann passè.
usp
