Atualità
La Comisciun por la sconanza dla contrada azeta cater proiec tles valades ladines
USP – I cater proiec azetà dala comisciun provinziala por la sconanza dla contrada reverda le mioramënt de na pista da paslunch a San Ciascian, le deslariamënt de na pista dai schi a Badia, l’ampliamënt de na lerch da lascè jö material te Mareo y l’implimënt de na büja tl comun de Sëlva.
Te süa ultima sentada, ai 23 d’agost, à la Comisciun por la sconanza dla contrada azetè de plü proieć, cater de chisc reverda les valades ladines.
A San Ćiascian ô l’assoziaziun turistica miorè la pista da paslunch a na manira che ara vais inće bun por gares dla Copa dl Monn. La Comisciun s’à damanè le control di laûrs da pert di verdabosch y na cauziun de 5000 euro. I laûrs reverda drenaji te trëi posć. Un é 75 metri lunch y passa tres pre fora, i atri dui mosöra 60 y 90 metri, te chisc dui caji mëss i laûrs gnì fać cun ros aladô dla Comisciun.
A Badia po la sozieté “Grandi Funivie Alta Badia” deslarié la pista dai schi “Roby – Bamby”. La Comisciun se damana inće tlo che i verdabosch ćiares sura i laûrs y che al vëgnes paié ite na cauziun de 5000 euro. Implü s’à la Comisciun y so presidënt Adriano Oggiano inće damanè de plü condiziuns por miorè la pista sön na lunghëza de 900 metri cun n spostamënt de 1500 metri cubics de tera.
Tl comun de Mareo à la Comisciun azetè de amplié na lerch da lascè jö material ćiavè fora. Chësta plaza dess gnì ampliada de 4800 metri a na manira che an pois mëte jö 7500 metri cubics de material implü. “L’ingrandimënt va debojëgn por podëi ćiavè tl raiun de espanjiun nü a Rina. A chësta manira vëgnel schivé le trasport de tröp material tres la valada“, spliga le presidënt dla Comisciun. Por chisc laûrs él gnü damanè na cauziun de 5000 euro y de fà crësce pro le raiun daldô.
Tl raiun de Piz Sella, tl comun de Sëlva pol gnì implenì sö na büja tla pista dai schi. Tla pert dessot dla ütia Comici orésson avalié fora la pista cun 2800 metri cubics de material. A chësta manira ne mëss la büja nia plü gnì implenida cun nëi artifiziala d’invern.
as
