Atualità
Ai 6 de utober: Durnwalder sun la Cumpededa dla jënt y detlarazion de grupa de rujeneda
USP – L mancia me plu puec dis nchin che scumëncia la Cumpededa dla jënt. Nce tla provinzia de Bulsan uniral dai 9 de utober inant cumpedà la jënt y i cuatieres, ma cun vel defrënza permez a l’autra pert dla Talia. Coche l vën fat la cumpededa y la detlarazion de grupa de rujeneda, y cie che ti spieta ai zitadins prejenterà l presidënt dla Provinzia Luis Durnwalder n juebia ai 6 de utober te na cunferënza stampa.
Uni 10 ani fej i istituc de statistica de dut Europa na nrescida sun i ponc de majera mpurtanza che reverda la populazion. Dut chësc vën fat per pité na basa de programazion ala politica y aministrazion publica. La nrescida ne vën nia me fata sun na pert raprejentativa, ma sun duta la populazion. L unirà cumpedà la families, la cumuniteies, la persones prejenteres me per ntant, ma nce la cëses y cuatieres.
L di de referimënt per la cumpededa ie l 9 de utober, do chësc di scumëncia l’atività de nrescida te duta la Talia. Tla provinzia de Bulsan vën la cumpededa fata a n’autra maniera permez a livel naziunel. Tlo da nëus se aspieten che trueps se nuzeie dla pusciblteies tres internet. A pèr cun la cumpededa vëniel da nëus nce fat la detlarazion de grupa de rujeneda che ie chëst ann per l prim iede na detlarazion defin statistica y perchël nce anonima.
Co che vën fata la cumpededa dla jënt y particularmënter la detlarazion de grupa de rujeneda, prejenterà l presidënt dla Provinzia Luis Durnwalder, l diretëur dl ASTAT Alfred Aberer cun la diretëura dl Ufize per statistica dla populazion Johanna Plasinger ntan na cunferënza stampa
n juebia, 6 de utober
dala 11.00
tla sala stampa dla Jonta provinziela
palaz Widmann, streda Crispi 3 a Bulsan.
as
