Atualità

Economia | 02.12.2011 | 15:41

Mubilità inuvativa y films ie la prioriteies de Widmann per l bilanz 2012

USP – Do avëi miurà y putenzià l trasport publich ntan i ultimi ani, vala sën de dl stabilisé y chësc nce da pont de ududa finanziel. Chësc à (NCUEI) ai 2 de dezëmber purtà dant l assessëur Thomas Widmann pra la prejentazion de si prioriteies per l bilanz provinziel 2012. Chël che unirà trat ite de plu dëssa unì nuzà per inuvazion tl ciamp dla mubilità.

Tl ciamp dla mubilità iel stat n gran svilup. Permez al 2003 canche l fova unì metù 81 milion te chësc ciamp, nen saral tl 2012 de ndut 195 milion de euro. “Te feter 10 ani iel budget unì ngrandì de 156 percënt, per arjonjer nosc fin strategich de culegamënc modernes n cont de orars y strutura” nsci Widmann. Sën che l vën pità de miëur culegamënc vala aldò dl assessëur de fé mo de pitli adatamënc y de stabilisé dut a n livel aut.

Chësc se lascia sentì sun l bilanz de previjion per l 2012. Cun 134 milion resta l bujën de finanziamënt per l servisc de trasport publich feter sun l medemo livel di ultimi doi ani. Do avëi adatà i servijes se an tëut dant de auzé la cualità fajan nvestimënc de passa 50 milion de euro te nfrastrutures y mesuns sciche ferates y curieres. L ie udù dant de nuzé chël che unirà trat ite de plu per l’inuvazion y a chësta maniera a bën di zitadins. Widmann à fat l ejëmpl dl culegamënt per l Überetsch, l culegamënt danter la Plose y la ferata, l culegamënt cun l Gitschberg y na ferata danter Schenna, Dorf Tirol y Maran.

Sciche proiet inuvativ à Widmann nce prejentà la sustëni per la produzions de films. “Ulon jì inant sun chësta streda ajache on suzes” à dit l assessëur. Per n auter ann iel udù dant 5 milion de euro per produzions de televijion. Uni produzion che giapa scioldi dala Provinzia muessa spënder amanca 150% tl Südtirol.