Atualità

Desvalì | 05.01.2012 | 16:23

Pröm punt zentral de fires otiches dl Südtirol sön Plan de Corones en funziun

USP - Le Presidënt dla Provinzia Luis Durnwalder à (incö) ai 5 de jenà metü en funziun adöm cun l’assessur Florian Mussner y l’assessur Hans Berger sön Plan de Corones le pröm punt zentral de fires otiches dl Südtirol. Tres punc zentrai sciöche chësc po l’internet aslöm gnì portè dai manajadus dla banda leria - y dla telefonia mobila tres la rëi de fira otica tla periferia. A chësta moda miorëia sides la cualité che la segurëza dl coliamënt.

Por la fin dl ann che vëgn ô la Junta provinziala colié düć i comuns dl Südtirol ala rëi de fira otica. „La Junta provinziala mët a desposiziun 50 miliuns de euro por la rëi de banda leria. Cun chësta orunse ti mëte a desposiziun a döta la jënt dl Südtirol l’azès al trasferimënt de dać aslöm. Scines de telecomunicaziun aslömes y sigödes é al dedaincö la premissa por le svilup y le bëgnester”, à dit le Presidënt dla provinzia Durnwalder.

La rëi de comunicaziun aslöma se basëia sön linies de fires otiches. I cabli de fires otiches à na gran larghëza de banda y garantësc le trasferimënt aslöm de tröc dać. La RAS é gnüda inćiariada dala Junta provinziala da mëte sö i punć zentrai de fires otiches (PoP; Point of Presence). Le pröm punt zentral é jü en funziun incö en presënza di rapresentanć dla Junta provinziala (le Presidënt dla Provinzia Durnwalder, i assessurs provinziai Berger y Mussner), dla RAS (le presidënt Rudi Gamper, le diretur Georg Plattner) y dl’autorité de control statala AGCOM (le diretur Vincenzo Lobianco) sön Plan de Corones. Le punt zentral é le „punt de comane“, olache i manajadus dl internet a banda leria y telefonia mobila po se tachè ite.

Le punt prinzipal sön Plan de Corones pro la staziun de trasmetënza dla RAS a 2.258 metri sura le livel dl mer é gnü realisé cun n coliamënt de fira otica nü da 7,5 km, dala staziun dla ferata nöia de Perca. Sciöche le presidënt dla RAS Rudi Gamper à dit, ti à la infrastrotöra nöia costè 750.000 euro. Por l’assessur provinzial Mussner se tràtera de n bun investimënt: „Chilò sön Plan de Corones vëgn les tecnologies nöies coliades y al é tler tan d’öga che ares é. L’ativaziun dl punt zentral é n ater vare devers nosc travert, chël de portè l’internet aslöm sön le lüch plü alalt.“ L’assessur provinzial Berger à ajuntè, che al n’é nia ma la popolaziun che po s’anuzé dl internet aslöm: „Inće por les aziëndes o por l’economia, sciöche por ej. por le turism é le coliamënt ala banda leria dër important, y al garantësc la competivité.“

La tecnologia de fires otiches nöia à tröc vantaji: a chësta moda po les informaziuns gnì ortiades inant te n aiet. Cun na sóra fira otica vara da dè inant ćina 10 tera-bit al secunt. Chël foss 10 miliuns de mb al secunt. Cun chël vara por ejëmpl da dè inant döt le contignü de 400 computri da Bornech ćina sön Plan de Corones te un n secunt. Implü ne n’é i cabli da fires otiches nia lià a raiaziuns prigoroses. I cabli da fires otiches ne po nia gnì interzetà é n’é nia sensibli a ćiamps de desturbs eletromagnetics.

usp