Atualità
26 de jené: cunferënza stampa di resultac dl’analises linguistiches tla scoles ladines
USP – L livel linguistich di sculeies ladins ie ultimamënter unì analisà per la cuinta tlasses dla scoles autes. Ti ani passei fovel unì fat l medem lëur per l’elementeres y la mesanes. N juebia ai 26 de jené uniral tenì na cunferënza stampa de prejentazion dl liber che tol ite i resultac de duta chësta analises linguistiches. Da nuef iel dantaldut l cunfront de resultac danter i trëi livei de scola y i resultac laurei ora plu a puntin.
L livel linguistich di sculeies ala fin dla scoles autes, dla scoles mesanes y dl’elementeres ie nce unì paredlà a scoles d’autra rujenedes che ne lëura nia do l model paritetich. La nrescides dl Servisc de evaluazion dla scoles ladines ie unides menedes y lauredes ora a livel universiter dal Zënter Cumpetënza Lingac dl’Università Liedia de Bulsan, dal’Università Vita-Salute San Raffaele de Milan y dal’Università de Turic (Zürich).
L pitl liber di resultac dl’analises linguistiches unirà prejentà te na cunferënza stampa,
n juebia 26 de jené
dala 10.00 danmesdì
tla sala stampa dl palaz provinziel Widmann,
streda Crispi 3 a Bulsan.
I resultac unirà prejentei dala pruf.a Rita Franceschini, diretëura dl Zënter Cumpetënza Lingac dl’Università Liedia de Bulsan y dal prufessëur Pasquale Della Rosa dl’Università Vita-Salute San Raffaele de Milan. Ala cunferënza stampa tulerà nce pert l ntendënt ala Scola Ladina Roland Verra y Presidënt dl Cumité per l’evaluazion dla scoles de Gherdëina y dla Val Badia Lois Ellecosta.
I culaburadëures di media ie nviei ala cunferënza stampa y a cunedì i cuntenuc.
as
