Atualità

Politica | 18.01.2012 | 11:50

Durnwalder pra l Vizekanzler Spindelegger: pachetl de sparani y tunel dl Prëner

USP – La cunseguënzes da manovra de sparani y liberalisazions per l’autonomia dl Südtirol ie (NCUEI) ai 18 de jené, stai argumënc dl’ancunteda dl presidënt Durnwalder cun l Vizekanzler Michael Spindelegger a Viena. N iede cialeran da pert dl Südtirol nstësc de marciadé cun Roma, sce l ne unissa pona nia respetà la normes de autonomia, speren sun l sustëni da pert dl’Austria. Cunsulënzes ie nce unides fates n cont dl tunel dl Prëner.

Dantaprima à Luis Durnwalder y l Vizekanzler y minister per cuestions oradecà, rujenà dla situazion economica n generel y la situazion politica a Roma. „É nfurmà l Vizekanzler dla cunseguënzes dla manovra finanziera per Südtirol y ti é segurà che marciaderon a uni maniera nstësc a Roma de nosc cuntribut per judé a ressané la finanzes stateles“ à dit l presidënt dla Provinzia, juntan che la Jonta provinziela pertënd de pudëi marciadé“.
La medema situazion iel nce n cont dla cunseguënzes dla liberalisazions da pert dl Guviern Monti. Tlo se tratel de ciamps ulache l unissa bel bret tucà la normes de autonomia. Nce te chësc cajo ulëssen n iede rujené diretamënter cun l presidënt di ministri Mario Monti per schivé ufendudes dl Statut de autonomia, dl Pachetl y dl’Acurdanza de Milan. „Sce do l marciadé cun Roma ne vën vel pert dla normes de autonomia nia respetedes, ei bel śën damandà sustëni a Viena“ à dit Durnwalder che à nce audì de na vijita de Spindelegger a Roma. „Tlo uniral nce rujenà dl’Autonomia de Südtirol“ à dit Durnwalder.

L segondo gran argumënt dl’ancunteda cun Spindelegger ie stata la linia dla ferata sëura l Prëner. Durnwalder ti à metù a cuer la mpurtanza che i lëures ne vënie nia fermei. I lëures sun chësta linia y frabiché l tunel dl Prëner ne reverda nia me la Talia y l’Austria, ma bën nce l’Europa. „Chësc à la Comunità Europea testemunià metan a desposizion de gran finanziamënc“ à dit Durnwalder speran che chësta mpermetudes ne vënie nia manacedes da l se tré de reviers de singuli stati. Spindelegger à segurà che l’Austria tën da si mpermetuda de lauré sun la linia dl Prëner, cossa che l uel nce seguré a Monti. Purempò ie l’Austria tl lëur de cuntrolé sce l se lascia sparanië te chisc lëures.