Atualità
Mostra dla ferata de Gherdëina slungëda nchin a Pasca
USP - La mostra mostra dla ferata de Gherdëina danter lecorc y vijions, tl Tublà da Nives te Sëlva, resterà davierta nchin a Pasca, ai 8 de auril. L Museum Ladin Ciastel de Tor à metù a jì modiei documënc uriginei, video y passa 100 fotografies dla ferata che dan 95 ani ova scumencià a furné da Tluses nchin te Plan.
La vijions che fova dan passa n secul unides svilupedes cun na ferata tres Gherdëina ie ncuei inò de autalità. L mesun de trasport inuvativ ova purtà adalerch turisć y ova menà demez truep auteresc y scultures. Aldidancuei, canche l vën cris do alternatives al gran muvimënt de auti, iel nteressant a nrescì cie che l ova ulù vester per giapé na ferata te Gherdëina.
La mostra tl Tublà da Nives, a puec metri dala vedla stazion de Sëlva, fova unida prugrameda nchin n dumënia passeda, ma per l gran nteres iela unida slungëda de 8 enes. Nteressei possa jì a ti cialé da merdi ala dumënia dala 10 ala 12 danmesdì y dala 17 ala 19 domesdì. L’ ntreda ie debant.
Nchinamò iel stat feter 8.000 persones che jì jic a ti cialé ala mostra dla ferata de Gherdëina, che d’ansciuda nchin d’autonn ie stata da udëi tla sënta dl Museum Ladin a S. Martin y da nuvëmber te Sëlva.
50 ani do che la ferata ne n’ie nia plu n funzion iela resteda n simbol dl tëmp che passa, propi ajache la ferata ie jita ite tl cuer de duc chëi de Gherdëina che ie furnei limpea, descedan de gran emozions y lascian truep lecorc. Chësc possen nce ntënder metaforicamënter. Tla mostra possen nce fìe n viac virutel: Cialan da viere ora vëijen l paesaje che, man man che n furnea inant, nes mucia sot’ora ajache n l vëigh mé per puec mumënc. N se lecorda mé cërta cosses dl viac, chëles plu mpurtantes o nteressantes ma dantaldut chëles che nes à tucà plu emotivamënter. Pra la stazions al incontra an l mesun de se fermé, y nsci de usservé plu giut ajache l ie l mumënt ulache la ferata sta chieta, n à plu dl'aurela, n po se fé pensieres sun cie che suzed te chël post.
La mostra lecorda la ferata y mostra su la tapes plu mpurtantes de si storia: dai primes proiec a si realisazion ntan la Gran Viera, dal passé dla gestion sot al stat talian nchin a canche la ie unida tëuta ju, dala particulariteies coche nzidënc y desgrazies ala costruzion di viadoc, puenc o tuniei. Nsci iel da udëi truep documënc tëuc ora dai archifs, esponac y pec che à da nfé cun la ferata, coche diaresc che lecorda i mumënc dla viera, lëures fac a man che i perjunieres rusc giamiova sun velch da maië, ma n puderà nce scuté su ntervistes a testemonesc, cialé films che reverda la ferata. Per chësta mostra an nce fat unì adalerch modiei de ferates y dla stazion a Urtijëi.
as
