Atualità
Basa finanziera segura per l turism tl Südtirol
USP – L turism dëssa unì finanzià cun trëi seves per pudëi seguré na miëura prejentazion sun i marcieies y per mëter n droa la reforma struturela dl’urganisazions turistiches. Pra la prejentazion dl model nuef (NCUEI) ai 5 de auril, à l assessëur al turism Hans Berger dit che l finanziamënt dëssa unì segurà da na cumbinazion de cuntribuc publics, na cuota per tlient che l turist muessa paië y da na cuota per l marketing da pert de duta la firmes che prufitea dl turism.
La urganisazions turistiches vën śën finanziedes cun mesuns provinziei, cuntribuc ulenteres, l sustëni di chemuns y ntredes da manifestazions. De ndut ruvel adum 43 milion de euro per l turism: 18 milion de cuntribuc ulenteres, 20 milion dala Provinzia (12 milion per l SMG y 8 per l’urganisazions turistiches) y 5 dai chemuns. Aldò de Berger va l sistem di cuntribuc ulenteres bën, me che l ie l risich dla melsegurëza finanziera ajache i ne ie nia udui dant per lege. Chësc risich ne ie per via dla gran mpurtanza dl Turism per l Südtirol nia plu da azeté. Mplù fossel aldò dl assessëur bele dai ani da auzé. „Südtirol muessa se fé valëi sciche destinazion turistica sun marcieies for plu cumbatui. L ne se trata nia plu de n marcià cun trëi o cater destinazions, l ruva do raions che ne fova nchinamò nia cunesciui y che à bele na bona posizion. Cun rejon vëniel dai ani bele damandà n majer finanziamënt per l marketing“ à dit Berger.
L model de finanziamënt prejentà pudëssa n cumbinazion cun criteries tleres de cualità purté an bon miuramënt dla situazion, nscì la cunvinzion de Berger. L finanziamënt dëssa unì da trëi pertes: dai tlienc, dala cumenanza (cuntribuc dla Provinzia y Chemuns) y dala firmes che prufitea dl turism (cuntribut per l marketing). Cun chësc model unissa l finanziamënt turistich ngrandì de na terza pert zënza ti ciarië su de plu ala firmes che dà bele l cuntribut ulenter. N fej cont cun 23 milion de euro dal cuntribut di turisć, 23 milion dala Provinzia y Chemuns, cun leprò mo 21 milion dal cuntribut per l marketing, ruvan nscì de ndut a 67 milion de euro per l turism.
La chëuta dl turist unissa tëuta ite a livel de chemun y pudëssa fé ora danter mez y al plù doi euro per turist a nuet. L unissa nce udù dant liberalisazions de chësta chëuta, per ejëmpl per mëndri o per uties da mont. Duta la ntredes de chësta chëuta unissa dates inant dal Chemun ala lia turistica dl luech/valeda y restëssa a chëla maniera tl luech.
La firmes che se nuzea dl turism te na maniera direta o indireta messëssa paië si pert ala Provinzia. N pënsa tlo a somes pausciales aldò dla categuries. Tla pruposta de lege iel udù dant na soma minima de 100 euro nchin a na mascima de 40.000 y la puscibltà de liberalisazions per firmes cun mënder volum de afars.
Sciche l ie nce te d’autri caji unissa nce tlo fat ora i particuleres do avëi tenì na descuscion cun i partner soziei y l’assoziazions di mestieres.
La Jonta provinziela ova bele de nuvëmber 2011 fat na pruposta de lege de chësc model de finanziamënt. Śën spera l assessëur Berger che l vënie prësc dat pro te Cunsëi provinziel per seguré l prinzip nuef de segurëza finanziera per l turism. Nsci pudëssen jì inant y lauré ora i details cun i partner. L assessëur se mbincia na mudazion d’aria: „te chësc mumënt vëniel dat la mprescion che la berca ie tl lëur de jì sot y che duc i passajieres uel salvé si avëi. Ëssi plu gën che duc judëssa a salvé la berca“.
as
Galaria dales fotografies
Landesrat Berger zu den wichtigsten Punkten der Reform der Finanzierung des Tourismus
- Scarica il file audio 1461 kb
