Atualità

Scora / Cultura | 20.04.2012 | 11:10

De plu iscrizions tla scoles autes ladines

USP - Per l ann de scola che vën se à danter scoles autes y prufesciuneles ladines scrit ite 6% de plu sculeies permez al ann passà. L majer aumënt ie stat tla Scola prufesciunela y Lizeum d’ert a Urtijëi. Aldò dl svilup demografich iel tla scoles de ublianza stat manco iscrizions y nscì se la cumpëida generela de sculeies mantenì feter valiva. Per l ann de scola 2012/13 iel tla valedes ladines de ndut 3.267 scric ite.

483 sculeies se à segurà na luegia te una dla scoles autes y prufesciuneles ladines per l proscimo ann de scola. Permez ala iscrizions dal ann passà iel stat n aumënt de 27 sculeies che fej ora l 6%. L mez de chësc aumënt ie unì a se l dé te na sëula scola, la scola prufesciunela per l artejanat artistich a Urtijëi che ie d’autonn passeda tla cumpetënza dla Ntendënza Ladina. Tlo se à scrit ite 14 sculeies de plu. De plu iscrizions iel nce stat tl Lizeum d’ert (+16) y tl istitut tecnich (+9) a Urtijëi. L Lizeum linguistich y istitut tecnich a La Ila à de ndut abù 12 iscrizions de manco. “Sce de plu jëuni uel inò se de ju tl ciamp dl’artejanat artistich ie chësc n signal dassënn positif per la scola y per duta la valeda. Rengrazië la grupa de lëur ntëur ala diretëura Elisabeth Baur per si mpëni” dij l assessëur Florian Mussner.
Per la prima tlasses se à de ndut scrit ite 95 sculeies. Permez al ann passà saral te duta la scoles autes y purufesciuneles 7% de manco sculeies che scumëncia l prim ann de scola.

Tla scoles de ublianza y tla scolines iel de ndut stat 2.784 iscrizions. Permez al ann passà ie chësc 84 iscrizions de manco che fej ora na reduzion de 3%. Tl cajo dla scoles de ublianza depënd la iscrizions dal svilup demografich tla valedes. Tla scoles elementeres (1.284 scric ite) se à mantenì la cumpëida generela, tla scolines (682 scric ite) y tla scoles mesanes (818 scric ite) iel stat na reduzion de 8 y 3%.

Sce n cumpëida adum duc i livei dla scoles tla valedes ladines ruven a na cumpëida de 3.267 iscrizions per l ann de scola che vën. Chësta soma generela se à cun 57 sculeies de manco, me mudà dl 1,7%.

Che tla scoles ladines iel propi la scoles autes n a avëi n aumënt de iscrizions vën valutà sciche singnal drët positif dal ntendënt Roland Verra: “Davia che te nosta valedes ne pudons nia pitè duta la spezialisazions, ie la scoles autes l ciamp plu problematich. Sce iust chësc ciamp crësc n cont de iscrizions iel sëni che l ie unì metù a jì na ufierta che nteressea la families.” Ti ultimi 10 ani ie uni an cresciuda la cumpëida generela di sculeies scric ite a scoles autes ladines.

Nce sce l mancia mo plu mënsc al proscimo ann de scola, vëniel tla direzions bele laurà per mëter a jì l’ena curta a 5 dis. “Chësc ne n gran mpëni urganisatif per la scoles ladins, n lëur che ie pià via cuncretamënter te chëla che i cunsëies de scola à azetà chësta nuvità” dij l assessëur provinziel ladin.

Iscrizions tla scoles ladines

as

Galaria dales fotografies

Tla scoles autes ladines iel stat n aumënt de 6% di sculeies: me tla prufesciunela y Lizeum d’ert nen iel per n auter ann 30 de plu;