Atualità
I ladins furlans se damana trasmisciuns
OSP - Le vizepresidënt dla Comisciun por i Afars Costituzionai dla Ciamena di Deputac, on. Pietro Fontanini dla Lega Nord, á te na interogaziun damanè le minister por les telecomunicaziuns, Maurizio Gasparri, che al vëgnes de plëgn apliché la lege 482 dl 1999 che reverda la sconanza di lingac storics y minoritars dla Talia.
Le deputat á damanè che tla proscima convenziun nanter i ministêrs a Roma y la RAI, che gnará firmada dan dala fin de chëst'ann, vëgnes inserí la poscibilité por la realisaziun de en notiziar radiofonich tl lingaz ladin furlan. Fontanini á recurdè che le finanziamënt (77 mile Euro) gniss metüs a desposiziun dala Regiun Friûl-Auneja-Giulia.Fontanini á ince damanè che sön les ones dla terza rëi bis dla televijun RAI vëgnel trasmetü en notiziar furlan. Le deputat à ince recurdè te süa interogaziun che le cunsëi regional dl Friûl-Auneja-Giulia á bele tl furà dl 2001 aprovè en ordin dl dé te chël che al gnê damanè la RAI l'atuaziun dla lege 482 y le Ministêr dles Comunicaziuns l'ampliamënt dla terza rëi bis dla RAI ince tles provinzies de Udin y Pordenon.
EB
