Atualità
Ancunteda di Alpini: rengraziamënt y prufit per l Südtirol
USP – L di do dla gran manifestazion dl’ancunteda di Alpini a Bulsan iel nce te Jonta provinziela unì fat n pitl bilanz: na gran festa, ne bela figura y na bona culaburazion. Riesc do la senteda à l presidënt Durnwalder (NCUEI) ai 14 de mei sorissà che l Südtirol a me prufità dla gran ntraunida.
L ultimo fin dl’ena à mustrà che te Südtirol iel mesun mëter a jì de majera manifestazions drët bën, y chësc aldò de Durnwalder, nce zënza pruvocazions politiches. L’ancunteda di Alpini se à damandà la culaburazion de istituzions y ulenteres, y chësta ie aldò di respunsabli dla Provinzia drët garateda. 794 persones danter ulenteres y dependënc à laurà ntant i trëi dis de ancunteda. La zentrela de prutezion zevila à coordinà 350 destudafuech y culaburadëures de prim aiut. Mplu fovel nce 225 persones dla forzes dl’orden stateles y 80 culaburadëures dla polizai dla zità de Bulsan y la grupa radiotrasmitënc. Tla zentrela dla Provinzia, tla zentrela de prim aiut y dla zentrela per la stredes à laurà 39 persones. Leprò ruva mo 40 culaburadëures dl servisc provinziel dla stredes. Duc chisc zënza cumpedé i culaburadëures dl cumité de urganisazion dl ANA.
“La culaburazion danter servijes dla Provinzia, la forzes stateles, l Cumissariat dl Guviern, i servijes de prim aiut y l’assoziazion di alpini ANA ie stata ezelënta” à dit l presidënt dla Provinzia, rengrazian ufizialmënter duc chëi che à judà pea al bon garaté.
L ie unì sciazà 250.000 persones che à fat pea l’ancunteda di Alpini, de chisc dëssel vester stat 160.000 da oradecà. I alpini cun i siei de familia ie ruvei adalerch cun 2000 curieres, 2500 camper y 15.00-20.000 auti. Tan de persones che ie ruvedes adalerch a Bulsan ne san mo nia. La grupes dl ANA cumpederà mo do internamënter y l’Eurac valuterà fotografies che ie unides fates da sëura ju.
Autramënter che velch se temova danora, ie i alpini ruvei adalerch per se ancunté y festejé. Aldò fova ne l’atmosfera te zità. L ne ie nia unì fat problems o pruvocazions de carater politich. Truep alpini n congedo ie stai a vijité la casermes ulache i ova fat la naia. “Ai vijitadëures se à prejentà n Südtirol daviert, che se n stà bën y zënza la tenscion di ani 60 cun bon tlima danter la grupes de rujeneda” à dit Durnwalder rujenan de n cumpurtamënt europeich. L resumee dla Jonta provinziela auza ora l prufit dl Südtirol n cont de bela paruda, efiziënza y nce n cont de prufit economich de feter 20 milion de euro permez a custimënc de 2 milion de euro.
as
