Economia | 14.05.2012 | 15:33

Recurs da Roma contra doi ponc dla lege per l cumerz

USP – Da pert dl Cunsëi di ministri fovel ruvà na lista de argumënc da pesimé n cont dla lege provinziela nueva per l cumerz. L Guviern udova che te de plu ponc ne respetëssa la lege provinziela nia diretives naziuneles y europees. Do na tëuta de posizion da pert dla Jonta provinziela, iel me plu restà doi ponc sun chëi che l unirà fat recurs: i raions de produzion y l’orar de giaurida.

Per limité la liberalisazions de cumerz, ova l Cunsëi provinziel dat pro de me pudëi vënder al detail te raions de produzion sce l se trata de cin categuries spezifiches. Chësc ne uel l Guviern nia azeté ajache l uel garantì la lidëza a uni un de vënder cie che l uel. “Chësc ie un di ponc zentrei de nosc urdenamënt y ne ulon nia zeder per pudëi nsci mantenì l cumerz ti zentri di luesc” sorissea l assessëur Thomas Widmann.

Nce la limitazions di orars de giaurida ne vën nia azetedes dl Guviern talian. La Jonta provinziela ulëssa che i chemuns scrije dant chisc orars aldò de si mutivazions. La Jonta provinziela à tëut la dezijion de purvé mo n iede a traté cun Roma per ruvé a na mudazion dla lege provinziela mpede a na sentënza dla suneria. Sce chësc ne garata nia, uelen defënder la lege provinziela dan a la Chëurt costituzionela. “Nchin a na sentënza resta la lege provinziela sun l cumerz n droa” à sorissà Durnwalder.

as