Atualità
Cumiscion se damanda n proiet nuef per l purtoi Cir te Sëlva
USP – La cumiscion provinziela per la scunanza dla cuntreda ne à nia azetà l proiet de slargë l purtoi Cir te Sëlva. Tla senteda da (NCUEI) ai 15 de mei se à la cumiscion damandà che l proiet vënie laurà ora da nuef.
L proiet vëija dant de ngrandì y splané l purtoi spustan material ju per l purtoi nstës. Aldò dl presidënt dla cumiscion Adriano Oggiano iel unì calculà de spusté 41.000 metri cubich de tiera. L raion n cuestion mesura 10.600 metri cuadrac. La se trata de ntervënc te doi lueges: tl canalone ulëssa la sozietà dla Dantercëpies fé lëures sun 660 metri de purtoi y tl raion dla „S“ sun 480 metri. Tl canalone iel unì proietà de spusté l purtoi dessëurapet y tl raion dla „S“ de fé l ntervënt dessot pert ulache l ie da crëp.
Te vel luegia fossel aldò dl proiet stat debujën de spusté material sun n toch 35 metri lerch y 10 metri aut, jan nce a giavé tl crëp. Te un n pont unissa l purtoi slargià da 35 a 85 metri.
L purtoi Cir ie sun sëida dl parch naturel Puez-Odles y dl raion „Natura 2000“ Gherdëina-Val-Puez.
Aldò dla segonda cumiscion provinziela per la scunanza dla cuntreda ne ie chësc proiet nia da azeté per via dla morfologia mujela y per la natura zitia de chësc raion. La cumiscion se à damandà de smendrì dassënn l spustamënt de tiera a na maniera che n ne vënie nia a se l dé ronesc ërc dedora dal purtoi. L proiet dëssa unì laurà ora da nuef tenian cont de ntervënc sun ponc spezifics, dla sëides dl crëp y di lims dl plann di purtoies y di mplanc portamont.
as
