Scora / Cultura | 16.05.2012 | 16:16

Panoram4 – gran mostra dl’ert nueva dla trëi grupes de rujeneda

USP – Te n mëns, ai 15 de juni uniral tla Furtëza de Franzensfeste giaurì la cuarta edizion dla mostra Panorama, la gran mostra che pieta na sëuravijion dl’ert atuela tl Südtirol. Ala scumenciadiva dla repartizions provinzieles ala cultura dla trëi grupes de rujeneda deberieda cun l Museion fej nce pea de plu artisc’ ladins. I assessëures provinziei ala cultura à (NCUEI) ai 16 de mei prejentà la gran scumenciadiva.

L Südtirol à n gran potenzial de artisć sun do la rata na pitla populazion: chësc vel mo de plu i artisć ladins. Panorama prejënta chëst ann, 9 ani do l’ultima edizion, na mostra dedicheda nia me ai jëuni ma plu che auter al’ert nueva. La se trata de mustré su 33 posizions de ert contemporanea y udëi cie che l’ert de chisc tëmps da cà te nosc raion. Per la populazion ladina à l’ert daniëura abù na gran mpurtanza che à nce purtà a n svilup economich. “Son ruvei a n mumënt ulache l’ert ladina muessa nce cialé danora. Panorama pieta n palch mpurtant per se fé cunëscer ma dantaprima per udëi co che l publich tol su la stredes nueves di artisć” à dit l assessëur ala cultura ladina Florian Mussner.

Tla grupa de curadëures dla mostra reprejentea Tobia Moroder la grupa de rujeneda ladina. Davia che Panorama uel mustré su l’ert nueva, à i curadëures nce ulù se destaché dala tradizion dl’ert figurativa ladina. “Chësc ie n mumënt storich per l’ert ladina ajache l ie da udëi na vëina sterscia de renuvamënt. L ie de plu artisć che muev da n cunzet figuratif, che ie si fundamënta artistica, ma che se fej stredes nueves” à dit Tobia Moroder, pra la prejentazion tl Palaz Widmann a Bulsan. I artisć Aron Demetz y Gerhard Demetz fej pea cun pec defin nueves che i ne à mo mei metù ora. Ëi reprejentea, aldò dl curadëur ladin, na sintesa danter artisć vedli y jëuni. Fabian Feichter y Diego Perathoner ie unic cherdei ala Panorama ajache i reprejenteda na vëta jëuna de artisć ladins che fej ert a na maniera defin nueva y inuvativa. “Da si rujeneda d’ert ne possen nia plu audì ora che la vën da artisć ladins” à dit Moroder.

Sun la basa dla prima trëi edizions de Panorama an ulù svilupé inant la mostra. La persunaliteies che fej pea ie esprescion de na generazion nueva d’ert. Nce sce l ne ie nia dut jëuni, ie l’età mesana de 33 ani, prejënti deberieda na gran varietà de tecniches. La mostra Panorama tla Furtëza de Franzensfeste gëura ai 15 de juni y resterà davierta dut l instà nchin ala fin de setëmber.

Deberieda cun la mostra vëniel nce dat ora n catalogh di 35 artisć cun critiches di lëures. Leprò vëniel nce fat n studi sozioeconomich sun la figura cumplessa dl artist. La grupa de curadëures uel nrescì velch sun argumënc che nerëssea la generazion nueva de artisć: la cualificazion massa auta, tecnologia, media nueves, mudazion dl sistem economich, nternazionalisazion o pruspetives geografiches. Aldò dl assessëura Sabina Kasslatter Mur vëniel nvestì 150.000 euro per dut l cunzet de Panoram4. “La ne se trata nce tl’ert de no se cunzentré me sun cie che ie stat, ma de cialé nce danora al daunì” à l assessëur Christian Tommasini tucà l cuer de chësc proiet per l’ert.

Panoram4
16 juni – 30 setëmber 2012
Furtëza a Franzensfeste
merdi 11.00 – 21.00, mierculdi – dumënia 11.00 – 17.00
d’agost nchin la 18.00

Artistes y artisć
Claudia Barcheri
Brave New Alps
Jacopo Candotti
Carla Cardinaletti
Daniel Costa
Nicolò Degiorgis
Alessandro del Pero
Aron Demetz
Gehard Demetz
Hannes Egger
Agata Erlacher
Fabian Feichter
Barbara Gamper
Thomas Grandi
Silvia Hell
Irene Hopfgartner
Ingrid Hora
Christian Kaufmann
Sonia Leimer
Cornelia Lochmann
Christian Martinelli
Sissa Micheli
Gabriela Oberkofler
Sarah Oberrauch
Kathrin Partelli
Diego Perathoner
Gianni Purin
Jörg Reissner
Scaf.Scaf
Leander Schwazer
Carlo Speranza
Benjamin Tomasi
Felix Tschurtschenthaler
 
Curadëures
Denis Isaia
Tobia Moroder
Christina Nägele
Lisa Trockner

as

Galaria dales fotografies

Do nuef ani saral chëst ann inò n’edizion de Panorama: i assessëures Tommasini y Kasslatter Mur cun dovia trëi curadëures ntan la prejentazion tl Palaz Widmann;