Atualità
Ai 25 de mei premiazion y prejentazion de „Autëures Ladins Scrij...“
USP – Trëi scric premiei dl cuncors de leteratura ladina scrit ora dal Assessorat ala Cultura Ladina plu mo autri trëi pec cris ora dala cumiscion ie unic stampei te n liber. La prejentazion dla stories per jëuni y jëunes, y la premiazion dl cuncors „Autëures Ladins Scrij...“ unirà tenida n vënderdi ai 25 de mei dala 6 da sëira tl local di jëuni Saut a Urtijëi.
La terza edizion dl cuncors de leteratura ladina ova d’autonn venciù i autores jëuni Tobia Moroder cun “Testamënt a jënt scunesciuda” dan a Ruth Videsott cun “I confins dla liberté”. Tla categuria di jëuni fovel me unì dat ora l segondo pest, y chël a Julia Runggaldier cun “L pra che ne n’ie nia”. La majera recunescënza per i scric ladins ie la publicazion te n liber.
Sun pruposta dla cumisicon dl cuncors à l Ufize Cultura ladina mo tëut ite trëi d’autri pec tla publicazion. Chisc ie unic scric da Elena Demetz, Elisabeth Kostner y Simon Kostner. La sies stories ie defrëntes de cuntenut y de stil, ma riches de simboi y uriginalità. L fil cuecen dl liber ie la tematiches dl curaje zevil, l daunì y la lidëza.
L pra che ne ie nia, ciauzei che n ne è nia l muet de cumpré, l berba dala fauc, doi ëiles te gabia, la superfizialità, l cult dl’estetica y l alcol ie me n valguni di simboi dla tematiches dla stories. L ie stories che fej spizé la urëdles y che l se paia a liejer.
Chësc liber unirà prejentà n vënderdi ai 25 de mei dala 6 da sëira tl local di jëuni Saut a Urtijëi. Pra la sëira leterera pueran audì coche i autores (Tobia Moroder, Ruth Videsott, Julia Runggaldier y Elena Demetz) liej ora de si pec, n salut y ntroduzion dl assessëur Florian Mussner y dl diretëur de repartizion Alexander Prinoth. Florian Großrubatscher prejenterà na pert musichela. Deberieda cun i autores dla stories uniral nce premià i prim plazamënc dl cuncors de grafica per l cuiertl dl liber.
D'autri comunicac stampa sun chësc argumënt
27.09.2011 - Prim pest dl cuncors de leteratura ladina a Tobia Moroder
20.02.2012 - Grafiches de Pitscheider y Polli per libri nueves de leteratura ladina
as
