Atualità
Lëures de Ivan Lardschneider tl Ufize dl’Euregio a Bruxelles
USP – Nchin ai 30 de mei iel tl Ufize dla region europea Tirol- Südtirol-Trentin a Bruxelles da udëi lëures de Ivan Lardschneider. La mostra dl scultëur de Sëlva ie unida giaurida n merdi ai 15 de mei.
Dan puec mënsc à Ivan Lardschneider pudù mëter ora si opres ala 54esima Biennale de Unieja, deventan do Aron Demetz l segondo artist de Gherdëina a fé pea la Biennale. Na desëina de lëures dl scultëur de Sëlva ie chisc dis da udëi ti ufizies dl’Euregio, tla Rue de Pascale a Bruxelles.
Pra la giaurida, n merdi ai 15 de mei, iel ruvà adalerch de plu persunaliteies sciche l parlamenter dl’Europa Herbert Dorfmann, l’espert de storia d’ert Fabio Anselmi y Maurizio Dessalvi dl Istitut culturel talian a Bruxelles.
L scultëur de 36 ani de Gherdëina à bele plu iedesc prejentà ora si opres oradecà, danterauter a Rhode Island (USA), San Gimignano, Roma, Berlin, Paris y SaintPaul de Vence. A Bruxelles ie i lëures de Ivan Lardschneider mo da udëi nchin ai 30 de mei.
as
