Atualità
Jonta provinziela: cumité per relazions bancaries
USP – Per cialé deberieda cie che la Provinzia y la banches da tlo possa fé tla situazion economica dl mumënt, iel ntan la senteda dla Jonta provinziela unì tenì n’ancunteda cun reprejentanc dla banches da tlo. (NCUEI) ai 21 de mei iel unì fat ora che n cumité di trëi assessëures provinziei Mussner, Widmann y Bizzo dëssa deberieda cun i diretëures generei dla banches lauré ora modiei per l daunì.
Tl’ancunteda se ala dantaprima tratà de udëi ora formes de culaburazion per ti vester ala situazion. “Chësc ie debujën ajache la crisa economica ne ie mo nia passeda y povester ne ons mo nianca arjont l pont plu bas” à dit l presidënt Luis Durnwalder do la senteda dla Jonta. L cumité de assessëures provinziei y diretëures de banches dëssa nchin te n mëns lauré ora modiei per ti dé na sburdla al’economia da tlo. La situazion economica dl mumënt à purtà dificulteies ajache la cundizions se à drët mudà permez a canche fova unì fat cuntrac. La cunseguënzes se lascià sentì sun la rates di credic, i fic de credic, la licuidità o garanzies curides cun puscions che à perdù valor. Dificulteies cumporta nce sce la banches se sënt sfurzedes a tò de reviers i mprësć o sce privac ne ie nia plu boni de paië ju credic per si cuatier.
Tl ciamp dl frabiché iel na situazion particulera. “Ti ani passei à la Provinzia frabicà truepa strutures, ntant ne iel nia plu tan debujën y a chësta a maniera iel de plu firmes che ne adurvessan tl Südtirol” à spiegà l presidënt dla Provinzia rujenan de export sciche na soluzion per chësc ciamp economich.
as
