Atualità
Finanziamënt nuef dl turism: lege vën publicheda n merdi
USP – La lege provinziela per seguré la stabilità dl sistem de finanziamënt dl turism, vën publicheda n merdi 29 de mei tla Gazëta ufiziela dla Region. Cun la lege nueva vëniel nvià via la cuota dl tlient y la puscibltà te do ite na cuota per l marketing da ativiteies che prufitea dl turism.
La lege provinziela de finanziamënt dl turism, laureda ora dal assessëur Hans Berger y purteda dant dala Jonta provinziela te Cunsëi provinziel, unirà publicheda tl’edizion 22 dla Gazënta ufiziela dla Region (dl 29 de mei) cun l numer 9 dl 16 de mei 2012. La lege jirà n droa doi enes do la publicazion.
L sistem nuef de finanziamënt dl turism cumporta aldò dl assessëur Berger che l’urganisazions turistiches giate na majera lideza de azion y la segurëza de pudëi prugramé. Leprò ruva che tres la trëi seves – i cuntribuc publics, l cuntribut di tlienc y i cuntribuc dl’ativiteies – miurerà dassënn l budget per l marketing turistich y a chësta maniera l’efizienza sun i marcieies.
Chësc unirà dantaprima a se l dé tres l cuntribut di tlienc dal 2014 inant. Co che chësc cuntribut unirà regulamentà plu avisa ne ie mo nia fat ora, la lege vëija me dant l cheder. “Nchin ala fin dl ann fajerons n regulamënt cun la cuota dl cuntribut y i caji che pudëssa unì delibrei” dij Berger.
L sistem dl cuntribut marketing resta ntant l vedl. L unirà tëut ite sun basa ulentera dal’ativiteies. Purempò iel tla lege udù dant na tlausula: sce cun la vedla maniera ne arjonjen nia i 18 milion de euro, possa la Jonta provinziela scrì dant l cuntribut marketing de ublianza per l ann do. “Te n tel cajo ons dl’aurela nchin ala fin de lugio per mëter su la regules tl respet di criteries udui dant dala lege per la singula categuries” dij l assessëur al turism. Do si ntënder segurea l sistem nuef de finanziamënt l marketing turistich a na maniera sustenibla, l ti dà plu mesun al marketing tla provinzia n generel, l revalutea l’urganisazions turistiches ti luesc y segurea si lëur, che ie essenziel per la mëndra ativiteies.
as
