Atualità
Miëura coordinazion dl retlam per la Dolomites-arpejon mundiela
USP – Canche la se trata de fé retlam ala Dolomites – arpejon mundiela, dëssen se coordiné miec danter la provinzies. Chësc ie unì fat ora n mierculdi 23 de mei danter i assessëures Hans Berger y si coleghes Tiziano Mellarini dl Trentin y Marino Finozzi per la region dl Veneto. Deberieda ulëssen nce se prejenté pra l’Expo a Milan dl 2015.
A Cortina se à ancuntà i respunsabli per l turism dla Jontes provinzieles de Bulsan, Trentin y dla regions Veneto y Friul, per traté co miuré l retlam per la Dolomites – arpejon mundiela Unesco. “Cun chësta arpejon ne ons nia me na richëza de cuntreda, ma nce per fé marketing turistich, sce son boni dl nuzé bën” dij l assessëur Berger.
Tl’ancunteda se ala dantaprima tratà de strategies per n tëmp plu lonch, ma nce de arjonjer plu efizienza. Aldò dl assessëur Berger dëssen cun na miëur coordinazion schivé n lëur dopl o trip y a chësta maniera dé plu forza a la prejentazion dla Dolomites sun i marcieies nternaziunei. Te chësc cuntest ne daussen nia sëuraudëi che l nuzé turistich muessa vester tla respunsabltà che n à de mantenì l’arpejon naturela.
Na gran ucajion de prejenté la Dolomites ie l’Expo 2015 a Milan. Chësc ie n palch nternaziunel a chël che ti cëla diesc mile persones. L ie na ucajion per se prejenté nce a n publich plu da lonc. Ma na tel prejentazion muessa unì proieteda bën. Aldò de Berger iel debujën de n cunzet realistich per pudëi nuzé bën l’ucajion dl’Expo.
Per miuré l marketing dl’arpejon mundiela iel bele prugramà mo d’autra ancuntedes a livel tecnich y politich ulache l dëssa nce unì trat ite l’aministrazion y la fundazion.
as
