Atualità
Ai 31 de mà presentaziun dl liber de stories por jones y jogn a La Val
USP – Le liber de stories por jones y jogn „Auturs ladins scrî…“ gnarà presentè en jöbia, ai 31 de mà dales 18.00 sön le lüch da paur Ciablun a La Val. Chësta publicaziun nöia é le früt dla terza ediziun dl concurs de leteratöra metü a jì dal Assessorat provinzial ladin.
Tl cheder dl cërtl cultural “Flus de Mà” gnaràl presentè le liber nü cun les stories dl concurs de leteratöra ladina: “Testamënt a jënt scunesciuda” de Tobia Moroder, “I confins dla liberté” de Ruth Videsott y “L pra che ne n’ie nia” de Julia Runggaldier. Dlungia i tesć premià à la comisciun dl concurs ćiamò chirì fora trëi d’atres stories por la publicaziun tl liber. Ara se trata de: “Resté nsci per for” de Elisabeth Kostner, “Al basta daurì i edli” de Simon Kostner y “L tëmp dla vita” de Elena Demetz.
Pro la presentaziun ai 31 de mà a La Val podaràn aldì i auturs Simon Kostner, Elisabeth Kostner y Ruth Videsott che liarà dant fora de sües stories. La sëra leterara gnarà abelida da tòć de musiga de Jean Daniel Granruaz.
as
