Atualità
Juebia 31 de mei: sëira sun i 40 ani dl’Autonomia nueva
USP – Dan 40 ani, de jené 1972, ie jit n droa l Statut de Autonomia nuef marciadà ora tl pachetl. Dan 20 ani, ai 19 de juni 1992, à i ambasciadëures UNO dl’Austria y dla Talia sotscrì la fin dl stritoz dan l secreter generel dla UNO Boutros-Ghali. Per n juebia 31 de mei nvieia la Jonta provinziela tl’Eurac a Bulsan per na sëira sun la dimenscion storica di doi anuei da chëst ann.
L 2012 iel n ann di anuei: da 40 ani ie l segondo statut de autonomia n droa y dan 20 à l’Austria y la Talia finà via l stritoz per l Südtirol. Te chësta ucajion uel la Jonta provinziela mustré su la streda che n à fat te chisc 40 ani y ulà che son te chësc mumënt. L ne vën nia sentà sun na manifestazion per l gran publich, ma na lingia de manifestazions, publicazion y mesures per arjonjer duta la populazion, dantaprima i jëuni.
La proscima manifestazion vën tenida n juebia 31 de mei tla sënta dl Eurac a Bulsan. Te na sëira uniral tratà la dimenscion storica dl’autonomia ududa ta de plu ponc de ududa. Christoph von Hartungen, Giorgio Mezzalira y Hans Karl Peterlini mustrerà su la streda che ie unida fata dala crisa al’Autonomia te na forma da ejëmpl.
Christoph von Hartungen rujenerà de co che n ie ruvei al Segondo Statut de Autonomia, Mezzalira rujenerà dla tenscion danter defendura dla mendranza y autonomia teritoriela, y Peterlini prejenterà pensieres sun la generazion dl 1972, i mutons dl’Autonomia danter ueia de muever y vedla tëmes.
La sëira unirà giaurida dal’assessëura Sabina Kasslatter Mur a inuem dla Jonta provinziela. Do la relazions uniral tenì na descuscion cun l publich.
La sëira tematica
sarà n juebia, 31 de mei 2012
dala 18.00
tla sala dla cunferënzes dl’Academia Europeica EURAC
tla streda Druso a Bulsan.
La ntreda ie debant y dla relazions uniral fat na traduzion simultanea.
as
