Atualità
Jonta provinziela per finanziamënc te chemuns ujins, ma nia provinzies ntieres
USP - Tla spartizion dla 40 milion de euro, che la Provinzia de Bulsan ie a una de paië ite tl “fondo Brancher”, dëssel me unì finanzià proiec ti chemuns che va nce a sëida cun la Provinzia de Bulsan y no provinzies ntieres. La Jonta provinziela ie stata a una de nia paië ite si pert sce chësc prinzip ne vën nia respetà.
Aldò dl’Acurdanza de Milan dl 2009 paia sibe la Provinzia de Bulsan y che nce chëla de Trënt 100 milion de euro al ann per sëurantò custimënc dl Stat. Cun 60 milion dëssel unì finanzià cumpetënzes nueves y cun l’autra 40 milion proiec o scumenciadives na maniera che l ne sibe nia de majera defrënzes da una y dal’autra per de sëida. La Provinzia de Bulsan va a sëida cun 7 chemuns, ntan che chëla de Trënt va a sëida cun 42 chemuns. Sce n cunscidra mo i chemuns ujins de chisc chemuns de sëida, aumënta la cumpëides de feter mo n tant. “Son a una che tramedoi somes de 40 milion vënie aministredes deberieda, ma la spartizion muessa unì fata aldò de chëi chemuns che và a sëida cun la singula provinzies” à dit Luis Durnwalder sorissan che i scioldi dl Südtirol ne dëssa nia unì nuzei per na streda dala rodes pra l lech dl Garda per ejëmpl. I assessëures ne azeta nce no che i scioldi posse unì nuzei da duta la provinzia ujina. L’aministrazion Brancher dëssa bele avëi dat pro n proiec per 17,3 milion a Verona, à dit Durnwalder.
Nchin che chësc prinzip ne vën nia recunesciù dal’aministrazion dl fondo Brancher, ne uel la Jonta provinziela nia paië ite la 40 milion de euro. “Sce assan da giapé n recurs, sons nce desposć de jì dan suneria” à dit l presidënt dla Provinzia.
Aldò de Durnwalder iesen a una de sustenì scumenciadives de carater culturel, soziel y economich. Nsci per ejëmpl i sculeies de Fedom che vën a Corvara a scola, l rumé la nëif sun la streda dl Ciaulonch, na streda dala rodes y da podejé danter Toblach y Cortina o azions de retlam deberieda.
as
