Atualità
Tueda y inuvazion: ponc zentrei y miëura coordinazion
USP – Per anjenië l’economia da tlo y l marcià dl lëur al daunì, se mpënia la Jonta provinziela bele dai ani tl ciamp dla tueda y inuvazion. (NCUEI) ai 29 de mei à i assessëures nciarià l presidënt dl’università de Bulsan, Konrad Bergmeister de traté cun duta la istituzions de tueda tl Südtirol per ruvé a na miëur’ coordinazion y n program de azion. L dëssa unì metù i ponc zentrei y coordinà l nseniamënt y la tueda.
Deberieda cun l presidënt dl’università Bergmeister à la Jonta provinziela tratà l svilup dla tueda tl Südtirol. Bergmeister à purtà dant si prupostes per coordiné miec l’università, l’Eurac y l TIS. I assessëures provinziel se rënd cont che te Südtirol muessen se dé a fé tl ciamp dla tueda, svilup y inuvazion, metan a jì sinergies danter la istituzions de tueda. Nsci se vëijen de bela de ruvé do sun i marceies y seguré l bënsté te n tëmp plu lonch. “N cont de tueda y inuvazion sons permò al scumenciamënt y per l daunì messons se la mëter a jì miec acioche nosc jëuni giate na bona furmazion y nce stieres de bon livel. Messon judé ala pitla ativiteies acioche les ie bones de mëter prudoc inuvatives sun l marcià” à dit Durnwalder.
La streda da tò, ie aldò dla Jonta provinziela chëla dla culaburazion danter l’istituzions de tueda. Nsci iel unì nciarià l presidënt dl’università Konrad Bergmeister de purté adum i respunsabli dla istituzions de tueda, de mëter ju i ponc zentrei dla tueda y de coordiné proiec de tueda.
Aldò di assessëures provinziei pudëssa i ponc zentrei vester l’energia, la roba da maië y la tecnologia alpina. “Te chisc ciamps ons de bona firmes che à nce l potenzial de fé produzion per l’export. Perchël iel drët che cunzentron i mesuns dla tueda te chisc ciamps” à dit Durnwalder. Deberieda cun la istituzions de tueda dëssa l presidënt dl’università lauré ora n program che tën cont di ponc zentrei y de na miëur coordinazion danter tueda y nseniamënt.
as
