Atualità
Dui posc de "auditurs iudiziars" por le grup etnich ladin
OSP - Incö daduman s'á l'assessuria provinziala al laûr, Luisa Gnecchi, adüm al diretur de Repartiziun, Helmuth Sinn, incuntè pro le Ministêr dl Laûr cun le responsabl dl Sorvisc imigraziun dot. Silveri, cun chël che al gnü tratè le tem dl assegnaziun dles cuotes de lauranc foresti in basa al Decret di flusc aprovè le 17 d'otober dl ann passè.
Tl cheder de chësc decret podará ruvè tla Talia 20.500 lauranc extracomunitars, de chîsc 4000 lauranc sajonai. L'incuntada fô nezesciara suradüt por ti gni adincuntra ai ustîs de Südtriol che s'á damanè plö lauranc tl setur dla hotelaria, en vijun ince dla sajun da d'invêrn che vëgn. Le problem revardënt la semplificaziun di visums d'ingres por i lauranc che vëgn dala Polonia y da chi dla Republica Ceca é ince gnü afrontè. Silveri á dit che le Sorvisc imigraziun adüm al Ministêr dl Laûr se cruziará al plö atira por ciafè na soluziun al problem. Sodesfaziun por i resultac arjunc á desmostrè l'assessuria Luisa Gnecchi dô l'incuntada.L'assessuria Gnecchi s'á spo incuntè adüm ai cons. provinziai Albert Pürgstaller y Martha Stocker, cun i responsabli pro le Cunsëi Suprem dla Magistratöra. Tem prinzipal é stè chël de mët a jí en concurs por auditurs iudiziars. Por la Provinzia Autonoma de Balsan sarál en concurs por curì 7 posc por auditurs iudiziars; 5 de chîsc é reservá al grup etnich tudësch y 2 é por le grup etnich ladin ester che al mumënt n'él ciamò degügn magistrac dla mendranza ladina. 33 é deperpo i magistrac dl grup etnich talian y 31 é chi dl grup etnich tudësch. Le concurs gnará metü a jí plö sigü ti prüms mëisc dl proscim ann.
EB
