Atualità
Plö controi pro les costruziuns publiches
OSP - Ti ultims mëisc él gnü constatè plö iadi defec y fai tles costruziuns publiches. Gonot an podü baié cinamai de fortüna sce porsones ne s’á nia fat en mal. Dan da en valgünes edemes él tumè jö le plafonn tla Ciasa di jogn „Kassianeum“ a Porsenú. Ince tl zënter sozial “Trayah“ a Bornech él tumè jö en plafonn.
L'assessur ai laurs publics, Florian Mussner, á atira dô chîsc inzidënc fat denunzia pro la Curt di cunc, por ciafè fora i responsabili y fa plüra por la refata dl dann a na moda che por le Govern provinzial ne sides degügn cosc ajuntifs. Pro chëstes mancianzes tles costruziuns publiches ne vara nia ma dla refata dl dann material, por chël che tla regula mussess les dites instësses se fistidié, mo ince da ciafè fora la responsabilité che i tecnics, i direturs di laûrs y i ejaminadus dla colaudaziun á da se to sö. L'assessur Mussner se damana porchël de cuantifiché les spëises dl aministraziun y le dann al inom dl Govern provinzial, che é gnü a s'le dè dô chîsc fac.A chësta moda gnarál controlè tles proscimes edemes dötes chëles costruziuns publiches, che á plö de trëi agn. La lista de chëstes costruziuns y i resultac di controi sará a desposiziun tl mëis de dezëmber.
Na prozedöra standard por to demez düc i defec y i fai tles costruziuns vëgn dütaurela laurada fora. En espert dl setur á bele elaborè en regolamënt por les prozedöres.
Les costruziuns publiches gnará controlades damí ince tratan l'esecuziun di laûrs.
EB
