Atualità
Delegaziun basca sön Tor por s'informè sura la mendranza ladina
OSP - Na delegaziun basca è ruvada inier, mertesc dômisdé, sön Ciastel de Tor a San Martin por vijité le Museum Ladin. La delegaziun, cun a cé le presidënt dl Parlamënt basch Juan Maria Atuxta Mendiola, adüm rapresentanc Gorka Knörr Borràs y Carmelo Barrio Baroja, ai mëmbri dla Junta Manuel Huertas Vicente y Kontxi Bildbao Cuevas cun en valgügn funzionars dl Parlamënt basch, è chîsc dis tla nosta provinzia por inrescí les carateristiches dl’autonomia de Südtirol.
Presënc fô inier sön Tor le presidënt dl Museum Ladin, Heinrich Huber cun le diretur Stefan Planker, le presidënt dl Cunsëi regional Franz Pahl y le vizepresidënt Carlo Willeit.L'ombôlt de San Martin de Tor, Pepi Dejaco, á te sò descurs splighé adüm al presidënt Huber la storia y l'identité dla mendranza plö vedla de Südtirol. Sotrissé él spo gnü i problems y l'importanza che le popul ladin á incö tl Europa. Le diretur Planker è spo jü íte plö avisa sön la storia dl Ciastel de Tor, i laûrs de restruturaziun, le program dles manifestaziuns y l'istituziun dl Museum. Leander Moroder, diretur dl Istitut Cultural Ladin "Micurá de Rü", á sotrissé l'importanza d'avëi na strotüra sciöche l'Istitut Ladin ch'á sciöche fin primar le stüde a livel scientifich dl lingaz, dla storia y cultura di ladins dles Dolomites y la promoziun de ativitês culturales.
Le diretur Planker á spo portè la delagaziun a fa na roda fora por le Museum. "Da passè tres le Museum Ladin pòn incuntè n valgönes zircostanzes particolares fòra dla storia y dl tëmp da sëgn di Ladins dles Dolomites", é ste le comënt dl presidënt Juan Maria Atuxta Mendiola, che adüm ala süa delegaziun s'á desmostrè dassën interessé ala cultura y ala tradiziun dla mendranza ladina.
Infin á le presidënt basch albü ince val parores de rengraziamënt por ladin. Inant ál recordè che ince la mendranza basca, sciöche i ladins, è tres ciamò spartis sö te deplö regiuns y stac. Les regiuns basches Araba, Bizkaia, Gipuzkoa y Nafaroa fej incö pert dla Spagna deperpo che Lapurdi, Zuberoa y Benafarroa è pro la Francia. Impò ó le popul basch porvè costantamënter sciöche i ladins, de mantegní, defënn y fa crësc la cultura, les usanzes y les tradizions, l'ert, le ciantè y dè forza al mantenimënt dl lingaz dla uma scrit y baié tres i mesi d'informaziun, les publicaziuns, les manifestaziuns culturales programades pur alzè en general le livel cultural. Na sciuncuda ti el gnü surandè ala delegaziun basca; le liber "I ladins dles Dolomites" tratan che i bascs ti á scinchè al diretur dl Museum Ladin le liber sura les mendranzes tl Europa ozidentala te chël che al è da ciafè ince deplö informaziuns sura la mendranza ladina.
EB
