Atualità
Sparani dl Stat: prupostes dala Provinzia
USP – I assessëures provinziei à njenià na lingia de prupostes co che l Stat pudëssa sparanië custimënt tl Südtirol. La pruposta zentrela dla Provinzia ie de sëurantò dut l custimënt dl Stat tl Südtirol, sce la possa lessù se tenì nce i ultimi 10% dla chëutes.
L Guviern talian à nciarià Enrico Bondi de analisé la pusciblteies de sparani te duta la Talia. Davia che per la pert provinziela se cruzia la Provinzia nstëssa de abiné pusciblteies de sparani, restel per Bondi te Südtirol me plu da cialé tres i custimënc dl Stat. Tlo se tratela de sparanië lëures dopli o tripli danter Stat, Provinzia y te vel cajo nce chemuns.
Te cunferënza stampa à l presidënt Durnwalder fat l ejëmpl de tò demez l Cumissariat dl Guviern y de ciafië nsci sciche n fej tla region Aosta. Ël à nce rujenà de tò demez la istituzion dla region: “i duvieres possa sëurantò la doi provinzies y sëuraprò se lascëssel abiné formes nueves de culaburazion” à dit Durnwalder. N auter ejëmpl de sparani pudëssa aldò dla Jonta provinziela vester la reduzion de cumissariac de Polizia y Carabinieri tla periferia.
Duta la prupostes che ie ruvedes adum dai assessëures provinziei unirà metudes adum a puntin y sëurandates a Bondi. Tlo uniral nce fat la pruposta de barat te chël che la Provinzia sëurantulëssa i custimënc dl Stat tl Südtirol (de ndut feter 500 milion de euro) y l Stat ti lascëssa ala Provinzia duta la ntredes dla chëutes che vën paiëdes tl Südtirol. Nchinamò muessa 10% dla chëutes (che fej ora feter 380 milion de euro) unì mandedes a Roma.
as
