Atualità
Jonta provinziela uel smendrì la fuera sun i jëufs
USP - Per smendrì la fuera sun i jëufs uel la Jonta provinziela de Bulsan mëter a jì n daz. Cun tant che l unissa trat ite, ulëssen mëter a jì n miëur trasport publich y a chësta maniera pité n alternativa sterscia al auto privat. Per arjonjer dut chësc sënten sun na culaburazion cun la provinzies ujines.
La fuera sun i jëufs, dantaprima chëla di motores, devënta for majera. “Son dla minonga che la miëura soluzion ie la reduzion dl muvimënt tres n daz, ma chësc ulessan arjonjer te na culaburazion cun l’autra provinzies” à dit l presidënt Luis Durnwalder (NCUEI) ai 11 de juni do la senteda dla Jonta.
I proscimi vares che la Jonta provinziela se à tëut dat ie de crì l dialogh cun la provinzia de Belun nce sce chësta vën ntant aministreda da n cumisser. Rujené ulësse sambën nce cun i aministradëures dl Trentin dan ruvé a na soluzion definitiva.
L presidënt dla Provinzia de Bulsan à te cunferënza stampa dit de ulëi finanzië n miëur trasport publich cun i scioldi che unissa trai ite da n daz. Sce chisc ne ëssa nia da basté, pënsen nce a tò ca i 40 milion udui dant per chemuns ujins che vën aministrei dal fondo Brancher. La vijion dla Jonta provinziela de Bulsan ie de pité n trasport sun i jëufs tan atratif che i auti privac unissa lascei a cësa. L assessëur Thomas Widmann ie unì nciarià de mené la tratatives cun la provinzies ujines.
as
