Atualità
Jonta provinziela: lizënzes per antënes y detlarazion de rujeneda
USP – Te si senteda (da NCUEI) ai 11 de juni à la Jonta provinziela dat pro na lingia de delibres. Tla cunferënza stampa do la senteda, à l presidënt cunedì de plu argumënc de majer nteres, danter chisc nce l dé ora dla lizënza per l antënes di fonins y l problem dla zertificazion dla detlarazion persunela de grupa de rujeneda.
Lizënza per antënes dal assessëur
Duc ëssa gën na bona rezezion dla rë di fonins, ma deguni ne uel l’antënes. Aldò dla Jonta provinziela ne dëssa la dezijion nia plu ti tumé a ambolc, ma al assessëur provinziel de cumpetënza. “da nëus iel bele valores de sëida plu basc permez a tla provinzies ujines y a crì ora la lueges per mëter su l’antënes vëniel a uni maniera cialà de schivé periculi per la jënt” à dit l presidënt Luis Durnwalder te cunferënza stampa. Aldò dla normes nueves per la strutures de comunicazion dëssa l assessëur provinziel tò la dezijions sun la lizënza, ajache te majera pert di caji reverda la cuestion de plu chemuns. Danora vëniel purempò damandà n bënsté da pert di chemuns.
Soluzion digitela per la detlarazion de rujeneda
Tla suneria provinziela a Bulsan ne vëniel te chësc mumënt nia data ora zertificazions dla detlarazion persunela de grupa de rujeneda. Cun la cumpëida de culaburadëures a desposizion ne iel nia mesun garantì chësc servisc. Per drët fossa chësc n servisc che l Stat messëssa garantì tl Südtirol.
Davia che l problem ne possa nia unì sburdlà tl tëmp, pënsen a na soluzion digitela per chëla che la Provinzia sëurantulëssa l custimënt de 20.000 nchin a 30.000 euro. Chësta soluzion cumporta de archivië la cuvertes cun la detlarazions te na forma digitela. “A chësta maniera unissel garantì l sucrët dla detlarazions y la cuvertes fossa ta tò ca debota, lauran cun manco personal” à dit Durnwalder. Da pert dla Jonta provinziela ulëssen riesc stlarì i particuleres tecnics a na maniera da ruvé amanca a na soluzion provisoria nchin che l possa unì laurà cun l sistem de archiviazion digitel.
as
