Atualità

Scora / Cultura | 15.06.2012 | 18:55

Panorama 4 a Franzensfeste ie davierta

USP – La gran mostra dl’ert nueva dla trëi grupes de rujeneda ie unida giaurida (n vënderdi sëira) ai 15 de juni dai assessëures provinziei ala cultura Mussner, Kasslatter Mur y Tommasini. Panorama 4 tla furtëza de Franzensfeste resta davierta dut l instà nchin ala fin de setëmber.

Südtirol à na muvimënt drët vif de ert contemporanea y n gran potenzial te formes defrëntes. 9 ani do l’ultima „Panorama“ iel tla Furtëza die Franzensfeste unì giaurì la cuarta edizion che pieta na sëuravijion dl’ert atuela tl Südtirol. Tla valedes ladines iel bele per tradizion n gran nteres per l’ert. Te chisc tëmps che i artisć ladins muessa se abiné stredes artistiches nueves pieta propi la mostra Panorama l cunfront cun defrënta posizions artistiches inuvatives. “I artisć possa tlo tla furtëza paredlé si vijions y crì l dialogh cun l publich. A chësta maniera vëniel nce sustenì l svilup dl’ert te nosta valedes” à dit la assessëur Florian Mussner.

Tla mostra panorama iel metù ora 33 posizions de ert contemporanea te nosc raion, da chëles che n possa udëi cie che l’ert de chisc tëmps da cà. Sun l palch de prestige possa nce se mustré cater artisć ladins. Aron Demetz y Gerhard Demetz fej pea cun pec defin nueves che i ne à mo mei metù ora. Ëi reprejentea na sintesa danter artisć vedli y jëuni. Fabian Feichter y Diego Perathoner ie unic cherdei a “Panorama” ajache i reprejenteda na vëta jëuna de artisć ladins che fej ert a na maniera defin nueva y inuvativa.

Tla grupa de curadëures dla mostra reprejentea Tobia Moroder la grupa de rujeneda ladina. Davia che Panorama uel mustré su l’ert nueva, à i curadëures nce ulù se destaché dala tradizion dl’ert figurativa ladina. “Chësc ie n mumënt storich per l’ert ladina ajache l ie da udëi na vëina sterscia de renuvamënt. L ie de plu artisć che muev da n cunzet figuratif, che ie si fundamënta artistica, ma che se fej stredes nueves” à dit Tobia Moroder.

“Panorama 4” ie na scumenciadiva dla repartizions provinzieles ala cultura ladina, tudëscia y taliana deberieda cun l Museion. L’ert nueva fej te chësc cajo n saut sëura la sëides dla rujenedes per pudëi cialé danora. Sun la basa dla prima trëi edizions de Panorama an ulù svilupé inant la mostra. La persunaliteies che fej pea ie esprescion de na generazion nueva d’ert. Nce sce l ne ie nia dut jëuni (l’età mesana 33 ani), prejënti deberieda na gran varietà de tecniches.

Deberieda cun la mostra vëniel dat ora n catalogh di 35 artisć cun critiches di lëures te cater rujenedes. Leprò vëniel nce fat n studi sozioeconomich sun la figura cumplessa dl artist. La grupa de curadëures uel nrescì velch sun argumënc che nteressea la generazion nueva de artisć: la cualificazion massa auta, tecnologia, media nueves, mudazion dl sistem economich, nternazionalisazion o pruspetives geografiches.

„Panoram4“
16 juni – 30 setëmber 2012
Furtëza a Franzensfeste
merdi 11.00 – 21.00, mierculdi – dumënia 11.00 – 17.00
d’agost nchin la 18.00

Artistes y artisć
Claudia Barcheri
Brave New Alps
Jacopo Candotti
Carla Cardinaletti
Daniel Costa
Nicolò Degiorgis
Alessandro del Pero
Aron Demetz
Gehard Demetz
Hannes Egger
Agata Erlacher
Fabian Feichter
Barbara Gamper
Thomas Grandi
Silvia Hell
Irene Hopfgartner
Ingrid Hora
Christian Kaufmann
Sonia Leimer
Cornelia Lochmann
Christian Martinelli
Sissa Micheli
Gabriela Oberkofler
Sarah Oberrauch
Kathrin Partelli
Diego Perathoner
Gianni Purin
Jörg Reissner
Scaf.Scaf
Leander Schwazer
Carlo Speranza
Benjamin Tomasi
Felix Tschurtschenthaler

Curadëures
Denis Isaia
Tobia Moroder
Christina Nägele
Lisa Trockner