Atualità
Nchin ala fin de juni 6 chemuns tachei ite ala fibres otiches – nce S.Ciascian y Ciastel
USP - Te chëla che la Provinzia fej na rë de culegamënc de fibra otica per l internet a slune, iel debujën che la Telecom adateie si aparac tla zentreles ti luesc. Sun pruposta dl assessëur Mussner à la Jonta provinziela (NCUEI) ai 18 de juni dat pro n’acurdanza per la prima zentreles te 6 chemuns. Danter chisc nce S.Ciascian y Ciastel. Nchin ala fin de chësc ann dëssel unì adatà de ndut 31 zentreles.
Cun la delibra prejenteda dal assessëur Florian Mussner à la Jonta provinziela fat n var mpurtant per ti pité a duta la populazion dl Südtirol l culegamënt internet a slune tres fibra otica. De dezëmber ova la Provinzia sotscrì n’acurdanza che la mët a despusizion i culegamënc de fibra otica te dut l raion provinziel y che la Telecom adateie si zentreles ti luesc a na maniera che la jënt posse nuzé la linies ADSL cun na capazità danter 7 y 20 mega bit al secunt.
Do avëi analisà a puntin i lëures che ie debujën de fé y jan inant cun la rë telematica provinziela, à la Jonta provinziela śën pudù de pro n’acurdanza per la zentreles di prim sies chemuns. Nchin ala fin dl juni dëssel unì tacà ite San Ciascian, Ciastel, Tirol, Falzes, Terlan y Oberbozen.
Tla segonda pert dl 2012 puderal unì metù a jì mo d’autra zentreles ruvan de ndut a 31 luesc tachei ite ala rë de fibra otica. “I culegamënc de internet a slune arjonj nchinamò feter 87% dla populazion, tacan ite la zentreles ai culegamënc che son tl lëur de fé arjunjerons nchin ala fin dl 2013 l 99% dla populazion” spiega l assessëur Florian Mussner.
De ndut 116 chemuns dl Südtirol, ne fova dl 2011 21 mo nia tachei ite ala rë de internet a slune y 12 me tachei ite n pert. Cun l program provinziel de miuré i culegamënc, uniral tacà ite duc i 116 chemuns. Te 27 luesc saral uniral arjont danter l 70 y 99% dla populazion y ti autri 89 chemuns uniral arjont tant che duta la populazion.
L gran mpëni dla Provinzia per arjonjer duta la populazion cun l internet a slune cumporta na puscibltà mpurtanta de svilup. “A chësta maniera iel mesun garantì nce l svilup ti raion da mont, ora de zità” à dit l presidënt Luis Durnwalder riesc do la senteda dla Jonta provinziela.
as
