Atualità
Purtina unica per scumencé ativiteies cumerzieles
USP – Per scumencé n ‘atività cumerziela ne saral tl daunì nia plu debujën de jì da n ufize al auter. Tla purtina unica puderan dé jù duc i documënc a na maniera da sparanië burocrazia, tëmp y custimënt. La Jonta provinziela se à (NCUEI) ai 18 de juni metù a una cun la Camera de Cumerz per pudëi bele ala fin de lugio scumencé la fasa sperimentela – leprò nce n chemun ladin.
La purtina unica per ativiteies cumerzieles metuda a jì n culaburazion danter Provinzia, Chemuns y Camera de Cumerz ie bele da doi ani sun mëisa dla Jonta provinziela, śën iesen ruvei tan inant da pudëi scumencé ala fin de lugio.
Pra chësta purtina possa mprenditëures dé ju la documentazions per nvië via n’atività cumerziela. I documënc vën da tlo mandei inant ai ufizies de cumpetënza per la registrazions y pona unirai inò mandei de reviers tla purtina unificheda ulache l mprenditëur giaterà la cunfermazion. A chësta maniera ne messerà tl daunì nia plu la persona fé la raida di ufizies, ma me plu i documënc. I ufizies à doi mënsc dl’aurela per cuntrolé i documënc. Sce velch ne fossa nia a post, giaterà l zitadin na comunicazion dala purtina unificheda.
La purtina nueva ie dantaprima de utl per giaurì n’atività cumerziela. Aldò di proscimi vares fai ora cun la Camera dl Cumerz y l’Associazion di chemuns dëssel ala fin de lugio unì giaurì la purtina te na forma sperimentela per cater chemuns. La purtina unificheda unirà anjenieda ite tla sënta dla Camera dl Cumerz che finanzieia 60% dl custimënt. L’autra pert unirà finanzieda dala Provinzia y dai chemuns. Cun l ann nuef dëssa i zitadins de duc i chemuns pudëi se nuzé dla purtina nueva.
L presidënt Luis Durnwalder à te cunferënza stampa spiegà che la purtina sarà de utl per duc i ciamps cumerziei ora che per la sanità.
as
