Atualità
Gerhard Demetz, reprejentanza ladina tla mostra Panorama
USP - Pra la gran mostra de ert nueva a Franzensfeste iel nce unì nvià cater artisc’ dla valedes ladines: I doi jëuni Fabian Feichter y Diego Perathoner, y doi artisc’ de majera esperienza Aron Demetz y Gerhard Demetz. Tla sëuravijion dl’ert atuela tl Südtirol iel de ndut da udëi 33 posizions de ert contemporanea. – Na prejentazion de Gerhard Demetz.
La figures de Gehard Demetz, nia finedes y defin carateristiches, ie metudes adum da n grum de pitli tapli de lën che ie sciche framënc de na storia mo da cunté. N generel se tratel de mutons, cun i uedli malinconics o belau dessenei, sintoms de ch’l cunflit mo nia madur cun sé nstësc y cun l mond di granc. L ie sciche sce chisc mutons ëssa perdù chëla inuzënza che son usei a udëi tla nfanzia. „L me à purtà a udëi nscila i mutons la teories de Rudolf Steiner. Do si minonga sënt i mutons, nchina sies ani de età, si inconsce y nce i mpulsc che ti ie unic dac inant dai antenac. Cun chësta ipotesa sons nce ie a una. Ie rate che chisc mutons se nsà per drët dla trasfurmazions de viers dl’età di granc, povester nce tres l’esperienza che ie ove fat passan dala nfanzia al mond di granc – na esperienza che recorde bëndebò sterscia.“
A Franzensfeste ie metui ora trëi lëures dla ultima produzion artistica de Demetz, che recorda n pue’ i ready-made de Duchamp. La scultures da udëi – simbuli ciariei de senificac religëusc – se prejënta al usservadëur che cëla avisa cun de pitla mudazions. L tabernacul, laurà drët fin y arjentà – tlo vëijen l virtuosism tecnich dla tradizion artejanela de Gherdëina – ie n pue’ stort, y tla maistronza iel mpede l’ostia cunsacreda na furchëta zënza dënz, che à nsci perdù si funzion.
Chisc lëures possa unì nterpretei te manieres defrëntes. I mostra su, te na maniera fina y mpo mpertinënta, nosc raport suvënz superfiziel cun l sacher, ma i nes porta nce a pensé do sun nosta segurëzes ntëur al gherist de valores y ideai che tën su la sozietà uzidentela de al didancuei.
Gehard Demetz (* 1972) ie chersciù su te Gherdëina, ulache l à fat la Scola d’Ert y la Scola Prufesciunela. Danter l 2000 y l 2001 al tëut pert a de plu cursc dla Internationale Sommerakademie für Bildende Kunst de Salzburg. L viv y lëura te Sëlva
Mostres y proiec plu mpurtanc
2012 Threshold Space, Jack Shainman Gallery, New York (solo)
2011 Contenitore, Beck & Eggeling new quarters, Düsseldorf (solo)
2011 Mutterland, l’età estranea, Fondazione Mimmo Rotella, Catanzaro (solo)
2010 La scultura italiana del XXI secolo, Fondazione Arnaldo Pomodoro, Milano
2009 Scope New York, New York, Galleria Rubin, New York
www.geharddemetz.com
Panorama 4
nchin ai 30 setëmber 2012
Furtëza a Franzensfeste
merdi 11.00 – 21.00, mierculdi – dumënia 11.00 – 17.00
d’agost nchin la 18.00
www.provinzia.bz.it/panorama
Articul dla mostra Panorama cun video y ntervistes a
www.provinzia.bz.it/usp-ladin/285.asp?aktuelles_action=4&aktuelles_article_id=396645
usp
