Atualità
Jonta provinziela: la tofles da mont possa unì baratedes
USP – L’acurdanza che l presidënt dla Provinzia Durnwalder ova marciadà cun l minister da n l’ëuta Raffaele Fitto, possa sën unì metù n pratica n puech al iede. Chësc ie unì fat ora (NCUEI) ai 25 de juni dala Jonta provinziela scebën che te vel caji ne iesen mo nia ruvei a una n cont dla rujeneda. Per 1420 de 1500 tofles iel tler: sce chëstes ie melciafiedes, posseles unì baratedes cun de nueves.
1500 de ndut 36.000 tofles metudes su dal Alpenverein, ie l ann passà unì cuntestedes dal’autorità per via che les ie me te na rujeneda sëula. Sciche fat ora danter l presidënt Luis Durnwalder y l minister Fitto, se ova pona na cumiscion dat ju cun chësta 1500 tofles di troies da mont. Ntant iel unì laurà ora soluzions per la tofles cuntestedes y me te 80 caji ne à la cumiscion abinà deguna soluzion. Nce sce la cuestion ie mo davierta per chësta 80 tofles, dëssel śën – aldò dla Jonta provinziela - unì scumencià a mëter n droa l’acurdanza. „Tla majera pert di caji ie la regulamentazion tlera, perchël possa la tofles, sun chëles che son a una, nce unì baratedes ora. L Alpenverein possa mëter su la tofles aldò dl’acurdanza Durnwalder-Fitto, te de plu rujenedes y ulà che l ie udù dant nce cun pictograms“ à dit Durnwalder do la senteda dla Jonta.
L barat dla tofles ne unirà nia fat dut te un n iede, ma do y do aldò che la tofles ie da mudé ajache les ne ie nia plu da liejer o melciafiedes. Per i 80 caji, te chëi che n ne ie nia a una, iel mo da aspité. Tla cunferënza stampa à l presidënt dla Provinzia detlarà che cun l barat dla tofles vëniel rumà sun cun la cuestion de stritoz danter la grupes de rujeneda. La regulamentazion dëssa aldò de Durnwalder nce unì tëuta su tla lege de toponomastica che n uel mo fé.
as
