Atualità
Mussner y Berger sëurantol la cumpetënzes de Laimer
USP – L presidënt dla Provinzia Luis Durnwalder à (NCUEI) ai 2 de lugio sëurandat ai assessëures Florian Mussner y Hans Berger la cumpetënzes de Michl Laimer, che ova dat ju si ncëria da assessëur provinziel. L’aministrazion dl’energia y dl’agenzia per l ambient ie passeda tla mans de Mussner, la pert che reverda l’urbanistica, natura y cuntreda à giapà Berger.
Te chëla che Michl Laimer ova dat ju si ncëria ie la cumpetënzes inò ruvedes al presidënt dla Provinzia. L Cunsëi provinziel à l’ena passeda dat pro de smëndri la Jonta provinziela y nsci à l presidënt pudù spartì su la cumpetënzes a d’autri assessëures. Laimer ova aministrà la repartizions natura - cuntreda, urbanistica, l’agenzia per l ambient y l ciamp dl’ega y energia. L’aministrazion dl’energia y dl’agenzia per l ambient sëurantol Florian Mussner. La doi repartizions natura - cuntreda y l’urbanistica sëurantol l assessëur Berger. Bele dai 5 de lugio uniral metù adum chësta doi repartizions sciche la Jonta ova bele fat ora da n pez, giatan la denuminazion Natura – Cuntreda – Svilup dl raion.
A Mussner y Berger ti resta la cumpetënzes che i ova nchinamò, nsci se cruzierà l assessëur Berger nce per cuestions de turism. Durnwalder à te cunferënza stampa spiegà che Berger, sciche assessëur provinziel de esperienza, à la capaziteis de aministré bën sibe la cumpetënzes da dant, che nce la nueves. „Dantaprima tl turism iel mpurtant che l sibe l medemo assessëur a purté inant la lege sun l finanziamënt dl turism che l à bele anjenieda cà. La lege dà dant n cheder de co che dëssa unì metù a jì l finanziamënt dl turism, ma nchin ala fin dl ann muessel mo unì dat pro la normes de atuazion. L ne fossa nia de utl sce n auter assessëur messëssa śën se lauré ite te chësta materia. Sce de jené 2013 saral debujën de fé mudazions ala Jonta provinziela, ti uniral dat l turism al assessëur al’economia Thomas Widmann“ à dit l presidënt. Cun la cumpetënzes nueves giata Berger nce la ncëria de nvië via doi reformes: una n cont dla lege urbanistica y l’autra n cont dl plann provinziel de svilup y de prugramazion urbanistica (LEROP).
L assessëur Mussner sëurantol riesc l’agenzia per l ambient y l’energia. Si dezijion à Durnwalder nstës mutivà cun la cumpetënzes che Mussner ova bele tla defendura tecnica dl ambient, sciche la sareneres y la deponies dal refudam, ma dantaldut nce l frabiché dl furnel dal refudam. „Mussner à bele esperienza te cuestions de ambient“ à dit Durnwalder. Tl ciamp dl’energia dëssa Mussner lauré su danter 150 y 300 dumandes de cunzescions dal’ega. A chësta maniera, nsci Durnwalder, arons pona finalmënter n cheder plu tler dla cunzescions.
as
