Atualità
Nce te Gherdëina y a Corvara butëighes daviertes da sëira
USP - Sëires cun la butëighes daviertes vëniel chësc instà pità te 34 luesc dl Südtirol. A chësta maniera vëniel sustenì l se purvé dl’economia ti luesc per valorisé mo de plu nce i mëndri zëntri. Danter i luesc ladins scumëncia per prim Corvara, n juebia ai 5 de lugio.
Danter i luesc te dut l raion dl Südtirol, iel chëst ann inò i luesc de Gherdëina y Corvara che pieta la sëires da instà ti zëntri. I luesc se baratà ju da sëira a sëira a na maniera che l ie feter duta l’ena nzaul velch daviert. L merdi sëira giaurirà la butëighes de Sëlva, S.Crestina y Ciastel, de mierculdi a Urtijëi, de juebia a Corvara y S.Crestina, y l vënderdi te Sëlva y a Urtijëi. L ultimo vënderdi de lugio y l penultim de agost, uniral tl zënter de Urtijëi sëuraprò nce pità n program de mujiga suneda dal vif.
L shopping da sëira vën udù sciche azion de gran valor per sustenì l cumerz y valorisé i zëntri ti luesc. “La sëires cun la butëighes daviertes tira sibe pra i turisć che nce pra la jënt dl luech. Per pudëi pité chisc mumënc de ancunteda y de atrazion iel debujën dla ulentà di buteghieres y dla culaburazion dla lies de turism, di chemuns, dla lies y dla ustaries” sorissea l assessëur Thomas Widmann.
La scumenciadiva dla butëighes daviertes toca avisa i obietives dla Jonta provinziela de valorisé l’atività cumerziela ti zëntri di luesc. “Nsci sciche ti proiec de valorisazion di luesc, per ejëmpl a S.Crestina, ulons mantenì la cualità de vita ti luesc y tl medemo mumënt tò pruvedimënc per valorisé i zëntri judan ai fé deventé mo plu biei y atratives” spiega Widmann.
L prim di luesc ladins a scumencé cun la sëires dla butëighes daviertes sarà chëst ann Corvara, cun juebia ai 5 de lugio. L’ena che vën scumencerà nce S.Crestina, Ciastel y Urtijëi. La prima sëira dla butëighes daviertes de Sëlva sarà ai 17 de lugio. Chësta azion va te duc i luesc ladins nchin ala terza ena de agost.
Nfurmazion sun duc i luesc che pieta d’instà l shopping da sëira vën piteda tres internet, ala plata www.provinzia.bz.it/wirtschaft.
Luesc ladins che pieta la butëighes daviertes da sëira
Corvara | juebia | 5 lugio - 23 agost |
Sëlva | merdi y vënderdi | 17 lugio - 24 agost |
S.Crestina | merdi y juebia | 10 lugio – 23 agost |
Urtijëi | mierculdi y vënderdi | 11 lugio – 24 agost |
Ciastel | merdi | 10 lugio – 21 agost |
as
