Atualità
N vënderdi ai 13 giaurida dla mostra de Gerald Moroder tl Istitut Ladin
USP – Tla sënta a dl Istitut Ladin a San Martin de Tor saral ntan l instà da udëi cater mostres de cater artisć’ ladins. La prima de chësta serie “Mostres 2012” ie de Gerald Moroder de Urtijëi che unirà giaurida n vënderdi ai 13 de lugio, dala 6 da sëira.
Cun la lingia de cater mostres uel l Istitut Ladin deberieda cun la lia Ert por i Ladins prejenté la varietà dl’esprescions artistiches dla valedes ladines. Nsci uniral metù ora scultures, pitures a uele sun tiera, nzijions y acuarei.
Gerald Moroder (1972), che prejënta la prima dla cater mostres, à fat la Scola d’Ert a Urtijëi, ulache l viv y lëura. L realisea si scultures adurvan materiai sciche lën, fier, pasta de porfir, de tiera y de ziedli. Tl zënter de si lëur ie la figura umana. Tres la scemplificazion dla formes dl corp crieiel figures delicates che reprejentea dumandes ejistenzieles intimes.
N vënderdi ai 13 de lugio, pra la giaurida, tenirà Else Prünster na ntroduzion. Deberieda cun l artist nstës, saral nce l presidënt y diretëur dl Istitut Ladin Albert Videsott y Leander Moroder. La giaurdia tla sënta dl Istitut a San Martin de Tor unirà tenida te n cheder muischel cun la grupa Secco.
La mostra dal titul “alter ego” de Gerald Moroder resterà davierta diesc dis, nchin ai 23 de lugio, cun i orars dala 10 danmesdì ala 6 da sëira.
La lingia de Mostres metudes a jì n culaburazion cun la lia Ert por i Ladins jirà inant ai 27 de lugio cun Gabriele Grones, Lili Cristofolini y Davide Brandlechner.
"Mostres 2012" tl Istitut Ladin a San Martin
Gerald Moroder | alter ego
13.7. – 23.7.
Gabriele Grones | ichnos
27.7 – 6.8.
Lili Cristofolini | relaziun
10.8. – 20.8.
Davide Brandlechner | corusc
24.8 – 3.9
as
