Atualità

Politica | 28.10.2002 | 15:45

Dezijiuns dla Junta provinziala: Bilanz de previjiun, contrat coletif por i insegnanc y furnadoia Munt Suc

OSP - En valgügn punc tratà tla sentada dla Junta provinziala d'incö.

Bilanz de previjiun 

Le bilanz de previjiun dla Provinzia por le 2003 é gnü aproè definitivamënter incö dala Junta provinziala. Chësc fej fora indüt 4 miliarc y 629 miliuns y 700 mile Euro, de chîsc 290 miliuns de Euro por partites de giro y 645 miliuns de Euro vëgn metüs da na pert por na eventuala cumpra dles zentrales dl ENEL. Laprò él gnü aproè la lege finanziara che cumpëda indüt 55 articli por enterpretaziuns legislatives, emandamënc a tesc de lege y stlarimënc de desposiziuns de lege. Amesa chîsc, en articul revardënt la comerzialisaziun dla forza eletrica; en ater che fej referimënt ala poscibilité de cumprè cuotes dla sozieté autostrades lasciades da atres sozi y en ater vëiga danfora la poscibilité de cumprè aziuns dla sozieté "Brennercom".

Contrat coletif

La Junta provinziala á autorisé incö l'assessur por le personal, Otto Saurer, a sotscrí le contrat coletif por le personal che insëgna. Chësc vëiga danfora por le 2002 na spëisa de 12 miliuns de Euro y de 13 miliuns de Euro por i agn che vëgn.

Furnadoia Suc-Munt de Suc

La Junta provinziala á incö aproè la secunda rata (1,549 miliuns de Euro) dl contribut complessif de 5 miliuns de Euro empormetü por la realisaziun dla furnadoia  Suc-Munt de Suc. Le terzo contribut che resta ciamò da paiè fora gnarà assegnè tl 2003.

 

PS: Prëibel injuntè la segnatöra (OSP) - Ufize Stampa Provinzial - tl mët man de vigni articul da nos menè fora y da Ösc media publiché. Giulan.

EB