Politica | 09.07.2012 | 15:08

Mpustazion de sparani dl Stat: Jonta provinziela se pera

USP – La Jontes provinzieles de Bulsan y Trënt, deberieda cun la jonta regiunel uel cunsulté deberieda co jì inant tl raport cun l Guviern a Roma n cont dla mpustazions de sparani. “Di per di nes vëniel da Roma damandà velch de leprò. Ne pudon nia plu azeté che a Roma vëniel tëut dezijions de sparani zënza respeté la normes de autonomia” à di l presidënt dla Provinzia Luis Durnwalder (NCUEI) ai 09 de lugio do la senteda dla Jonta provinziela.

La Jonta provinziela ne uel nia plu azeté dut chël che ti vën metù dant dal Guviern talian. Aldò dl ultimo decret dëssa la Provinzia mo sparanië 80 milion de euro. Śën se pera l presidënt: “ne pudon nia pu azeté chël che vën pertendù da Roma. Sciche é bele dit plu iedesc ulons nce nëus fé nosta pert per ressané la finanzes dl Stat, ma co y te ciun ciamps che l vën sparanià tlo da nëus, ulons nstës fé ora tl cheder de nosta cumpetënzes autonomes”.

Ultimamënter an audì dla despunibltà da pert de Roma de marciadé cun la Provinzia, ma nchinamò ne iel a Bulsan mo nia ruvà comunicazions ufizieles. N mierculdi de chëst ena se ancunterà la Jontes provinzieles cun la Jonta regiunela tl palaz Widmann per fé ora deberieda co jì inant. Aldò de Durnwalder se damanden de pudëi riesc rujené cun l Guviern per pudëi fé ora deberieda tant che l muessa unì sparanià tl Südtirol, ma pona uelen nstës tò la dezijion co sparanië chisc scioldi. “L’Autonomia y la normes spezieles muessa unì respetedes. Mplu sons dla minonga che l pat de stabilità muessa unì adatà ala situazions speziela dla doi provinzies autonomes”.

L pat de stabilità scrij dant che la Provinzia de Bulsan ne possa nia spënder feter 300 milion de euro. De ndut muessa duta l’aministrazions autonomes paië 860 milion de euro a Roma per judé a ressané la casses dl Stat. Per la Provinzia de Bulsan fejel ora 120 milion de euro, leprò muessa i chemuns mo paië feter 60 milion de euro. Cun l ultimo decret iel sën mo n iede ruvà 80 milion de euro leprò.

Da stlarì iel pona mo la pert provinziela dla chëutes spezieles dl Stat. “Ala Provinzia de Bulsan ti spieta 90 percënt dla chëutes che vën paiedes ite tl Südtirol, sce l Stat auza la chëutes, nes spieta mo for l 90%” à dit l presidënt dla Provinzia. Ala fin di conc ne ie nce l crëscer economich tl Südtirol nia plu tan grant sciche dan n valgun ani y perchël muessa la Provinzia dlongia l scurté de bilanz, nce ciafië cun manco chëutes.

Da pert dla Provinzia iel unì fat recurs a duta la normes dl Guviern talian che va contra l’Autonomia, scebën che chësta ie me na soluzion transitoria, ajache la pruzedures se tira ala longia. “Te chësta situazion iel massa puech me jì dan la chëurt costituzionela. Messon anjenië l bilanz de previjion per i proscimi ani y ne pudon nia aspité che la suneria nes debe rejon” à dit Durnwalder. Te chësta situazion fermerà i departimënc per na segura mo n iede trëi percënt de si mesuns finanziei. Bele al scumenciamënt dl ann ova i assessëures provinziei fat ora de fermé 5 percënt de si mesuns finanziei a despusizion.

usp