Atualità
Proiet interreg por la sanité y la cualité dla vita inće a Badia
USP – Le sostëgn dla cualité dla vita y dla sanité te comuns dl Südtirol y di Grijuns: chësc é le fin dl proiet Intereg IV sagns deboriada “insieme sano-gemeinsam gesund” che à metü man dan da oramai n ann. Cin comuns dl Südtirol Badia, Türesc tla Val Müstair, Vahrn, St. Martin in Passeier y Truden sciöche inće cin comuns di Grijuns sostignarà y metarà a jì scomenciadies de partezipaziun ativa da pert dla popolaziun. Śëgn él inće gnü publiché n foliet che reverda chësc proiet.
Tl foliet de dodesc plates gnü fora por le pröm iade "insieme sano - gemeinsam gesund" (da ciafè sciöche PDF tla injunta) vëgnel presentè i comuns che tol pert al proiet, descrit les tapes desvalies de chësc proiet y presentè en general i aspeć desvalis y les tröpes aziuns inviades ia; śëgn röiel bëgn 11.000 ejemplars de chësc foliet pormò stampè tles ćiases di diesc comuns che à tut pert y sambëgn ti vëgnel inće menè ai rapresentanć dla politica dl Südtirol y di Grijiuns. Ala fin dl proiet tl scomenciamënt dl ann che vëgn gnaràl ćiamò dè fora n’ediziun de chësta plata sciöche documentaziun finala danatdöt por i comuns che tolarà pert tl dagnì a chësc proiet.
L’assessuria por le sozial Edith Dapoz é la responsabla dl proiet tl comun de Badia; pro chësc grup de laûr alda inće Pasquale Pischeider (rapresentant dla jonëza), Sabine Federa (responsabla dl raiun sozial) y Valeria Clement (rapresentata dla ëres).
Tl Südtirol él la repartiziun provinziala „Familia y politiches soziales“ a će dl proiet Intereg IV; la Fondaziun Vital sciöche zënter de competënza por la promoziun dla sanité é gnüda inćiariada da mëte a jì la majera pert dl proiet y da coordiné le proiet sura i confins fora. Martina Vieider dla Fondaziun Vital che é responsabla dl proiet sotrissëia che le proiet depënn dala colaboraziun dla popolaziun y che al é porchël d’importanza da informè les zitadines y i zitadins sön i argomënć desvalis a na manira da descedè te ëi la vëia da tó pert ativamënter a süa realisaziun.
usp
