Politica | 16.07.2012 | 18:58

Regions autonomes se damanda na tlausula de scunanza

USP – Na revijion dla norma per smendrì l custimënt dla sanità tla regions che se la finanzieia nstësses, recunëscer l’Acurdanza de Milan y na tlausula de scunanza: chisc ie i trëi ponc che i presidënc dla provinzies autonomes de Bulsan y Trënt deberieda cun i presidënc dla Val d’Aosta y dl Friuli Venezia Giulia à fat ora (NCUEI DOMESDI) ai 16 de lugio a Borghetto all’Adige.

I presidënc dl’aministrazions autonomes Luis Durnwalder, Lorenzo Dellai (Trentin), Renzo Tondo (Friuli Venezia Giulia) y Augusto Rollandin (Aosta) ie tla “Tenuta San Leonardo” a Borghetto stai a una che Roma ne possa nia ji inant cun si sparani autoriter permez al’Autonomies dla Talia. “Chësta agrescion al’Autonomies ne possa nia unì azeteda. L Guviern se astiela zënza respet y ne tën nia ite l’acurdanzes y la normes. Se pareron cun duc i mesuns” à dit l presidënt Durnwalder. A inuem dla cater Autonomies iel unì fat ora de nia fé i scurtamënc ti ciamps dla sanità. “Nëus ne giaton nianca n euro per chësc capitul, perchël ne fajerons nce nia i pruvedimënc de sparani che l Guviern a Roma pertënd da nëus” à dit l presidënt dla Provinzia. I cater presidënc se damanda de pudëi tosc scumencé la tratatives che ie ududes dant danter Regions y Stat tl’acurdanzes defrëntes.

L terzo pont che ie unì fat ora a Borghetto reverda i pruvedimënc da pert dla Guviern a Roma che toca la regions autonomes n cont dl “Spending Review”: canche l decret dëssa unì trasfurmà dal Parlamënt te lege, dëssel unì ntegrà na tlausula che respetea la singula acurdanzes danter l’Autonomies y l Stat.

Durnwalder à lecurdà che a Viena iel da permò unì tenì na zeremonia per festejé i 20 ani dala fin dl stritoz danter Talia y Austria per via dl Südtirol, ma che te chisc 20 ani ne iel mo mei stat na situazion tan zitia per l’Autonomies. “L Stat uel nes traté sciche l’autra regions y chësc ne puons nia azeté. Chësc ne possa nianca se permëter n guviern tecnich. Fajon recurs a duc i pruvedimënc de Monti, ma chësc ne ie nia na basa per na culaburazion seria” à dit Durnwalder. N adrova segurëza per pudëi prugramé l bilanz da n auter ann y perchël muessen riesc pudëi ruvé inant. “Ne pudon nia aspité sun la sentënzes dla Chëurt costituzionela” à dit l presidënt dla Provinzia.

I proscimi vares che l Südtirol, Trentino, Valle d’Aosta y Friuli Venezia Giulia uel fé a livel politich, ie de se ancunté cun l presidënt dl guviern Mario Monti y cun l presidënt dl Stat Giorgio Napolitano.

as

Galaria dales fotografies

Deberieda dan la Tenuta San Leonardo a Borghetto: (d.m.c.) Renzo Tondo, Luis Durnwalder, Lorenzo Dellai y Augusto Rollandin.