Atualità
Finanziamënt ai comuns de Südtirol por le 2003
OSP - Le finanziamënt ai comuns de Südtirol por le 2003 é ste incö tl zënter dla discusciun intratan l'incuntada nanter le presidënt dla Junta provinziala Luis Durnwalder y Franz Alber, presidënt dl Comitê de coordinamënt dl Consorz di comuns y ombôlt de Maran. Le finanziamënt por le ann che vëgn é de 382,9 miliuns de Euro, che corespogn a en aumënt de 40 miliuns respet al finanziamënt da denant.
Söla basa de na acordanza amesa le Consorze di Comuns y la Junta provinziala ti speta ai comuns vigni ann le 13,5 porcënt dles entrades dla Provinzia Autonóma de Balsan, secundo i capitui 1 y 2 dl bilanz provinzial, a chël che al rüva ciamò laprò la cuota dles compensaziuns relatives ales entrades dles cutes comunales.Dô le bëgnester dla Junta al bilanz provinzial de previjiun s'él daurí incö daduman tl Palais Widmann a Balsan la tratativa amesa la Provinzia y les aministraziuns locales por i finanziamënc relatifs al 2003.
Le presidënt Durnwalder á ilustrè le bilanz provinzial de previjiun por le 2003, da chël che al resultëia che i finanziamënc por i comuns, fissà söla basa dla cuota dl 13,5%, amuntarà por le proscim ann a 382.909.000 de Euro, che corespogn a feter 40 miliuns de Euro deplö cô tl 2001. Chësta soma gnará partida sö nanter i comuns söla basa dla "cuota por cé", é gnarà dandadüt adurada por proiec d'investimënt tl edilizia scolastica y por fianzié la costruziun y restruturaziun de frabicac y infrastrotöres publiches.
Le presidënt Durnwalder y i rapresentanc di comuns à te chësta ocajiun arjunt en acordanza che vëiga danfora en aumënt dl 20 porcënt por ci che reverda le finanziamënt por l'ampliamënt di trusc da jí cun la roda. A chësta moda vëgnel metü a desposiziun la soma de 6 miliuns de Euro por la rëi de trusc da jí cun la roda te Südtirol. I rapresentanc di comuns s'à te chësc cajo damanè che la manutenziun dla rëi di trusc da jí cun la roda sides partida sö amesa la Provinzia y i ënc locai: la prüma se fistidiarà di intervënc cun l'aiüt de mascinns tratan che i ënc locai - por meso dles Comunitês de Val - di laûrs manuai.
Tl cheder dl incuntada él ince gnü baié dl finaziamënt di comuns plö pici (chi che cumpëda manco de 1.200 abitanc) che adora avaliaziuns vigni ann por feter 1,6 miliuns de Euro y che vëgn cherdà a concretisé les mosüres de sparagn tla gestiun.
PS: Prëibel injuntè la segnatöra (OSP) - Ufize Stampa Provinzial - tl mët man de vigni articul da nos menè fora y da Ösc media publiché. Giulan.
EB
