Atualità
En vëndres, ai 27 deura la mostra de Gabriele Grones tl Istitut Ladin “Micurà de Rü”
USP – Cun la mostra de Gabriele Grones gnaràl en vëndres, ai 27 de messè 2012 dales sis da sëra, daurì la secunda mostra da d’isté tl Istitut Ladin a San Martin de Tor. Deboriada cun la lia Ert por i Ladins él gnü metü a jì na ligna de indöt cater mostres de artisć ladins che sarà do y do da odëi tratan döt l’isté.
Ala daurida dla mostra “ichons” de Gabriele Grones da Reba saràl presënć dlungia l’artist instës inće le presidënt y le diretur dl Istitut Ladin Albert Videsott y Leander Moroder; an podarà aldì n’introduziun de Katharina Moling. Da cornisc musicala ala daurida dla mostra tla sënta dl Istitut a San Martin de Tor fajarà le duo RAW, che é Irene Hopfgartner al cello y David Clement ala chitara.
La mostra de pitöres a öre de Gabriele Grones restarà daverta diesc dis, ćina ai 6 d’agost, cun i orars dales 10 danmisdé ales 6 da sëra.
Gabriele Grones (1983) à studié pitöra al’Academia d’Ert de Aunejia. Al vir y laôra danter Reba y Rovigo. Le soget de süa ert é le müs dla porsona. Al depënj cun corusc a öre sön tëra. La pitöra é por l’artist n meso de inrescida che al tol por analisé y jì plü sot tla porsona.
Cun chësta ligna de cater mostres ô l’Istitut Ladin deboriada cun la lia Ert por i Ladins presentè la varieté dles espresciuns artistiches dles valades ladines. Insciö gnaràl metü fora scoltöres, pitöres a öre sön tëra, inzijiuns y acuarei. Cun la mostra de Gerald Moroder él gnü invié ia la ligna “Mostres 2012”; ai 10 d’agost gnaràl daurì la mostra de Lili Cristofolini y ai 24 d’agost chëra de Davide Brandlechner.
"Mostres 2012" tl Istitut Ladin a San Martin
Gerald Moroder | alter ego
13.7. – 23.7.
Gabriele Grones | ichnos
27.7 – 6.8.
Lili Cristofolini | relaziun
10.8. – 20.8.
Davide Brandlechner | corusc
24.8 – 3.9
as
