Atualità
Esperc a una cun la lege per la families
USP - N lunesc à la Jonta provinziela nvià via l valivé dla cundizions per strutures che cëla de fantulins, (NCUEI) ai 19 de lugio à l assessëur Theiner fat l proscimo var per la lege dla families, la tratan cun la grupa de esperc dan che la pruposta de lege vënie pona do la pausa da instà data pro dala Jonta provinziela.
La grupa de esperc lëura bele da fauré per dé cunsëies a svilupé la lege per la families nueva. La 22 urganisazions reprejentedes tla grupa à śën tëut tres la pruposta de lege anjenieda dala repartizion per familia y soziel. “Nes on tëut dant de tré adum duc i pruvedimënc de sustëni - y tlo ne se tratela nia me de cuntribuc – che reverda la familia. La Jonta provinziela à bele dat pro la pert per l’assistënza di fantulins, śën iel unì tëut tres i ponc zentrei dla lege che va dala ntroduzion dla cunsulta per la families nchin a na pruposta de criteries per n sustëni economich” spiega l assessëur Richard Theiner.
Sce dut va sciche l ie udù dant unirà la pruposta do l instà trateda dala Jonta provinziela y te feter mez ann dëssa la lege nueva per la families pona jì n droa. L dipartimënt de Theiner à śën l duvier de ntegré la prupostes y cumedures di esperc, de mëter adum dut te na pruposta de lege y de la dé inant ai assessëures provinziei.
La minonga tla grupa de esperc ie drët positiva: la pruposta de lege à mpulsc positives y la prupostes dl’urganisazions ie unides azetedes. N pont zentrel che ti stà a cuer ai esperc ie la cualità dl’assistënza ai fantulins. L proscimo var mpurtant ie la definizion de n budget per la families da pert dla Jonta provinziela, a na maniera che l possa unì tëni cont de pruvedimënc finanziei cuncrec.
Da pert dla Provinzia fovel pra la senteda l diretëur de repartizion Luca Critelli, Michaela Stockner dl Servisc ala families, Gerhard Mair vizediretëur dl Ufize per la families, ëiles y jëuni deberieda cun l presidënt dl ASWE Karl Tragust.
as
