Politica | 23.07.2012 | 13:57

Jonta provinziela: pericul dal Stat per la cumpetënzes dl strom

USP – Aldò dl test provisor per na lege statela nueva ne puderà la Provinzia nia plu nstëssa mëter su criteries per dé ora la cunzescions dal’ega per fé strom. L Presidënt dla Provinzia Durnwalder à (NCUEI) ai 23 de lugio riesc mandà n telegram al minister de cumpetënza per se damandé stlarimënc.

Tl pachetl sun l crëscer economich che unirà chisc dis tratà te Parlamënt a Roma iel na pert sun la cunzescions dal’ega per fé strom. Per la Jonta provinziela ne iel te chësc mumënt nia na cuestion de cunflit de nteres per la sozietà de avëi provinziel SEL. “Tlo se tratela bën de plu, l Stat uel nes tò sotora nosta cumpetënza sun la cunzescions da fé strom cun l’ega” à dit l presidënt Luis Durnwalder te cunferënza stampa. Aldò dla verscion provisoria dla pruposta de lege unissa duta la pruzedura de sëurandé cunzescions regulamenteda tres lege statela. Te chësc test dëssel vester scrit che nce la provinzies autonomes à da se tenì a chësta lege nueva.

Chësta pert che reverda dla provinzies autonomes ne fova aldò de Durnwalder mo nia tla verscion laureda ora dal Guviern Talian, la dëssa vester ruveda ora dala cumiscion legislativa. “Ncuei danmesdì ei mandà n telegram al minister Corrado Passera per damandé na regulamentazion straurdinera” à dit l presidënt dla Provinzia, ajache la va defin contra la normes de nosc Statut de Autonomia.

Canche la pruposta de lege sarà n iede mandeda inant al Parlamënt saral rie fé mudazions davia che l Guviern Monti fajerà bonamënter la dumanda de crëta y te chël cajo ne possen nia plu fé mudazions. Nsci pënsa la Jonta provinziela a na plura dan la Chëurt Costituzionela.

Davia che śën se tratela n iede dla pruzedura per dé ora la cunzescions dal’ega, ne à i assessëures provinziei nia tratà l cajo de n cunflit de nteres sce la Provinzia dà ora la cunzescion a na sozietà de si avëi sciche la SEL.

as