Atualità
Cumiscion provinziela azetea ntervënc a trëi purtoies tla valedes ladines
USP – Cumedures ai purtoies dai schi sun Secëda y Dantercëpies, n culegamënt per fé nëif sun Piz Sorega, sëura S.Ciascian, y l mëter ju material a Corvara ie (INIER) ai 24 de lugio unic azetei dala Segonda cumiscion provinziela per la scunanza dla cuntreda.
L purtoi danter Secëda y Marëufer possa unì slargià. La Segonda cumiscion provinziela per la scunanza dla cuntreda à azetà n ntervënt sun n toch de 130 metri che fova plutosc strënt. L proiet dla sozietà Seceda AG de Urtijëi vëija dant de slargë l purtoi de trëi metri arjunjan na larghëza de 12 metri. Sun la pert dessëura uniral trat ju n toch de crëp y dessot pert uniral metù su na rë de segurëza. La cumiscion provinziela à azetà l ntervënt a cundizion che l vënie laurà cun cautela y che l vënie abinà na soluzion per n miëur cialé ora dla rë. L patron dl purtoi muessa paië ite na cauzion de 8.000 euro y garantì che l unirà do i lëures inò fat crëscer ite l raion.
Tl raion dai schi de Dantercëpies puderal unì fat mudazions al purtoi Frara. Aldò dl architet Walter Karl Dietl, che à menà la senteda, se tratel de me n pitl ntervënt per pudëi taché adum doi purtoies dai schi. L proiet ie unì mandà ite dala sozietà Danterceppies AG de Sëlva.
Tl raion danter Piz Sorega de viers de La Ila puderal unì fat n culegamënt sot a tiera per taché adum doi resservares dal’ega da fé nëif. L proiet mandà ite dala sozietà "Grandi Funivie Alta Badia" de San Ciascian reverda i resservares "Piz Sorega 2" y "La Freina". La Segonda cumiscion provinziela per la scunanza dla cuntreda à azetà chësc ntervënt cun la mutivazion che l se trata me de n pitl ntervënt per miuré l mplant da fé nëif.
La cumiscion provinziela à nce azetà che l vënie metù ju material che unirà giavà ora a ngrandì l hotel “Costes” a Corvara. Tl raion de Planac iel udù dant de mëter ju feter 2000 metri cubich de material sun na spersa de 2100 metri cuadrac. La cumiscion per la cuntreda à dat pëis che l ne puderà nia unì metù ju material fulestier y che do i lëures muessa la luegia inò unì fata crëscer ite.
as
