Atualità
Cunsulta ladina di jëuni sustën l’ativiteies per jëuni
USP - La Cunsulta provinziela ladina per l ciamp di jëuni sustën che l vënie dat priorità al finanziamënt de ativiteies per jëuni permez ai nvestimënc te strutures. Chësc ie stat l pensier zentrel dla senteda che la cunsulta à tenì n mierculdi ai 25 de lugio a la Ila.
Un di lëures prinzipei dla cunsulta di jëuni ie propi chël de fé prupostes co che la Jonta provinziela dëssa mpusté l finanziamënt dl lëur per y cun i jëuni. Tla senteda a La Ila iel bele unì cialà inant a ciunes che pudëssa vester la prioriteies per l 2013. I reprejentanc dla Val Badia à purtà dant che l studi di jëuni a mustrà su na gran ulentà per ativiteies a livel de valeda. Tlo se tratela śën de cialé che per de tei proiec sibe nce mesun n sustëni finanziel. Davia che na lege se damanda de dé majer pëis ai nvestimënc te strutures iel per l Ufize provinziel per i jëuni rie a mëter a jì l finanziamënt de ativiteies straurdineres a livel de valeda.
La Cunsulta ladina di jëuni se damanda perchël cun duc a una che per l ann 2013 vëniel dat majer pëis al capitul che reverda al finanziamënt de personal, ativiteies y proiec. “Chësc ie debujën per pudëi lauré cun i jëuni coche l vën nce adurvà” sorissea Wilma Runggaldier dl Ufize provinziel di jëuni.
Tla senteda a La Ila à la Cunsulta ladina danterauter nce cialà inant al’ancunteda dla cunsultes provinzieles dla trëi grupes de rujeneda d’autonn y a argumënc de atualità per i jëuni. L diretëur de Ufize Klaus Nothdurfter à prejentà proiec che l ufize provinziel ie tl lëur de nvië via per i jëuni de duta trëi grupes de rujeneda.
as
